Шанче да практик конференций 31 октябрьыште Марий кугыжаныш университетын педагогический институтыштыжо эрта, школлаште тунемше, кыдалаш да кӱшыл тунемме заведенийлаште студент-влакым, тыгак кажне кумылан еҥым уша. Тидлан презентаций йӧнлан эҥертен возымо докладым Марий Элын кугыжаныш: марий да руш – йылме дене ямдылыман. Ныл теме пуалтеш. Тиде – ешын тукымвож пушеҥгыже, ешын реликвийже, ешын тукымвож аралтышыже да марий калыкын сӱан йӱлаже, ача-аван сӱанже.
Тушко ушнышо-влак 20 октябрь марте пашаштым Республикысе марий тӱвыра рӱдерыш mari-centr@mail.ru электрон адресыш колтышаш улыт.
Регион-влак кокласе краевед конференцийыште лудмо доклад-влак электрон йӧн дене лукмо ойпогыш пурталтеш да тудым Республикысе марий тӱвыра рӱдерын сайтыш верандат.
«Российысе марий-влакын федерал калыкле-тӱвыра автономийышт» мер ушем ден Республикысе марий тӱвыра рӱдер Марий Эл Республикын тӱвыра, печать да калык-влакын пашашт шотышто министерствыжын, Марий Эл Республикын туныктыш да шанче министерствыжын, В.М.Васильев лӱмеш йылмым, сылнымутым да историйым шымлыше марий институтын да Марий кугыжаныш университетын полшымышт дене регион-влак кокласе краевед конференцийым эртарат.
