Пайремын йӱла ойыртемжым Республикысе марий тӱвыра рӱдерын пашаеҥже-влак почын пуэныт. Васликугыза (Марий Элын сулло артистше Александр Бирюков) ден васликува (Марий тӱвыра рӱдерын пӧлкажым вуйлатыше Людмила Кошкина), салтак-влак (артист Алексей Юнусов ден мурызо Геннадий Григорьев), рывыж (рӱдерын пашаеҥже Надежда Тимофеева) озаватын (рӱдерын методистше Галина Ласточкина) суртышкыжо (сценыш) пуреныт. Озавате ургымо, тӱрлымӧ, шӱдырымӧ пашажым ончыктен. Вет Шорыкйол ыштыме пашам ончен коштмо арня лийын. Йӱла почеш, марий еҥ кеч-кунамат паша ӱзгаржым ончылгоч ямдылен. Васликугыза, укшан тояжым рӱзен-рӱзен, озаватын кидпашаже-влакым мокталтенат колтен, мыскара шомакымат каласен. Озаватын кидпашаже-влакым ончаш толшо-шамычат мокталтен ойленыт. Васликугыза идалыкын могай лиймыж нергенат палдарен. «Шорыкйол могай—идалык тугай»,—марий калык манеш.

Пайремыш калык марий йӱлам шукташ ямдылалт толыныт, «кумытшат окса, шымыржат окса» манын мурен куштеныт, мӧчӧр-влак деч идалык, еш илышышт могай лиеш йодын кертыныт. А шкешт, сугынь шомаклан тауштен, мӧчӧр-влаклан пӱкшым, кампеткым пуэныт.

Шорыкйол пайрем годым мужедмаш, модмаш тӱрлӧ лийыныт. Тасма полшымо дене мужырым кычалыныт, портышкемым кышкен, нерже кушкыла вочмо дене ӱдырын марлаш лекшаш велым пален налыныт.

Пайрем мурылан поян лийын: Марий Элын калык артистше Зоя Берникова, мурызо-влак Любовь Орлова, Валерий Чиванов, Ольга Якимова, Александр Мамаев, Геннадий Куклин, Йошкар-Ола гыч «Весела сем» фольклор ансамбль, «Кас сем» группо ончаш толшо-влакым куандареныт.

Шорыкйол пайрем олаш лакемалтше марий ешлан йӱлам тӱшкан шуктен шогымо дене шерге.