Курымарий район Картуково села гыч «Пуры цӓш» (вуйлатыше Тамара Петрова), Советский поселко гыч «Кугезе кумыл» (вуйлатыше Галина Щербакова), Параньга район Усола гыч «Мурпеледыш» (вуйлатыше Вера Лопкина) Унчо селаште, мӧчӧр лийын, сурт еда коштыныт, озавате ден озан кидпаша мастарлыкыштым аклен мокталтеныт, нунылан да ешыштлан пиалым, мландын поянлыкшым, яндар каван тыныслыкшым тыланеныт. Унчо велне марий калыкын кугезына-влакын йӱла радамыштым кызытат шуктен шогат. Ӱстембалне погымо чес ожнысо жапыш конден: мӧчӧр-влакым сийлаш лӱмынак руаш гыч пӱкшым кӱэштыныт, тудым мӱй дене тамлештареныт, шокшо коҥгаш шӱмге кӱктымӧ пареҥге, пура дене сийленыт, варажым, кудывечыш лектын, мужедыныт.

Кастене Унчо ялысе тӱвыра пӧртыштӧ «Марий кас» веселан эртен. Вӱдышӧ, Марий тӱвыра рӱдерын методистше Галина Алексеевна Ласточкиналан пайрем касым эртараш ялысе мӧчӧр-влак полшеныт. Тауштен, кажныштлан изирак пӧлекым кучыктымо.

Финн-угор калык тӱнян тӱвыра рӱдолажым почмашке толшо эстон уна-влакат «Марий касыште» лийыныт, калык дене пырля марла кушталтеныт, мужедмаш ден модмашке ушненыт. «Кугезе кумыл» ден «Мурпеледыш» ансамбль-влак касым весела мурышт дене куандареныт. Тале гармоньчо Леонид Ермаковын шокталтымыж почеш погынышо-влак тӱрлӧ кундемыште илыше марий-влакын ойыртемалтше семышт почеш тавалтеныт. Икте куандарыш: Унчо велне йоча-влак марла моткоч чаплын куштат, ача-ава дене пырля лектын кушташ нимыняр огыт аптыране.

Пайрем-влакым сӧрастарыше коллектив-влак Таумут дене палемдалтыныт.

2019 ий мучко Унчо селаште марий калык йӱла дене кылдалтше тӱнямбал кӱкшытан вич мероприятий эртаралтеш. Чылаже 12 мероприятийым эртараш палемдыме.