Марий калык конгрессын 2018 ийысе пашаже нерген мер толкын вуйлатыше, ЙСИШМИ-н директоржо Евгений Петрович Кузьмин ойлен.

Мер толкынын ик тӱҥ пашаже – марий калыкын тале эргышт-влак нерген шарнымашым арален кодымаш. Эртыше ийыште марий просветитель, шанчызе В. Васильевлан, «Акпатыр» икымше марий оперын дирижержо Г. Таныгинлан  шарнымаш оҥам почмо. Тыгак В.Васильевын марий калыкын эртыкше нерген книгам лукмо. Лукмо вес савыктыш – марий салтак-влакын икымше тӱнямбал сарыште лиймышт нерген.

Марий Эл Республик Виктер Вуйлатышын икымше алмаштышыже Михаил Зиновьевич Васютин Марий калык конгрессын пашажым мокталтен, калык коклаште туныктымо (просветительский) пашажым умбакыжат шуэн шогаш тыланен.

Иктешлымаш погынымашыште тыгак Тӱвыра, печать да калык-влакын пашашт шотышто министрын алмаштышыже-влак Михаил Иванович Матвеев ден Галина Степановна Ширяева лийыныт. Галина Степановна тӱрлӧ грант проектыште сеҥымылан конгрессын пашажлан сай акым пуэн, умбакыжат тиде сомылым шукташ тыланен ойлен.

Марий конгрессын еҥже-влак федерал кӱкшытан кевытлаште сакымлӱм-влакым марий йылме дене ямдылыме йодышым угыч нӧлталыныт.

Февраль гыч июль марте школлаште икымше классыш йочам колташлан ача-ава-влак йодмашым возат, тыгодымак ача-ава-влак икшывыштлан могай йылмым шочмо йылме семын ойырат – возышаш улыт. Сандене районласе конгрессын еҥже-влаклан тидын шотышто ача-ава-влак дене умылтарымаш пашам эртараш кӱлмӧ нерген каласыме: марий ялыште шочмо йылме марий йылме лийшаш.

Погынымашыште ревизий комиссийын отчетшым колыштмо, 2019 ийлан паша планым пеҥгыдемдыме.

Погынымаш деч вара Археологий тоштерыш (Т. Евсеев лӱмеш калыкле тоштерыш) экскурсий дене мийыме.