Теве тачат шуматкече… Мыят таҥватем дек йыҥгыртышым: «Шондык гыч марий тувыретым лук, Марий касыш каена», — маньым. Автодор тӱвыра полатыш пурымына годым марий куштымо сем пылышыш шокта. Тевыс кушто марий калыкын шӱм-чон поянлыкше. Марий чонан айдемыже тиддеч посна иленат огеш керт.  Марий тӱвыра рӱдерыште тудо аралалт кодын. Гармонь да тӱмыр почеш Медведево, Оршанке, Морко, Урал, Эрвел, Киров вел марий-влакын мурсем почешышт муралтен-кушталташ йӧн уло. Чонжо кузе кана?! Теве вӱдышӧ саламлалте, эрвелмарий-влакын мурен-куштымашышт ден Марий кас почылто. Меат, йолташем ден кушталташ тарванышна. Таҥватем рвезе ӱдырым ужын шуктыш: «Ончал, ончал, могай самырык ӱдыр кушта». Мыят тидлан куанышым. Эсогыл шыргыжал колтышым, тек кушта, тек кид-йолжо лывырга.

Икмыняр куштымаш деч вара Марий касын вӱдышыжо Л. Сидоркина «Мемнан годсо муро» йыжыҥым увертарыш. Тыманмешке «Ош пеледыш» фольклор ансамбль шочо. Мураш кумылан-влак ик радамыш шогалын «Ош пеледыш», «Ший шергаш», «Лек уремыш танем» муро-влакым уло кумылын йоҥгалтарышт, а молышт ныжыл семыш ушнен вальсым пӧрдыч. Марий эстраде аланышкат толын шуна. Теҥгылыште шинчыше-влакат тарванышт, коеш, марий эстрадылан утларак шўман улыт.

Вес йыжыҥ увертаралте: «У муро сем ден куштена». Тиде йыжыҥыште Елабуго вел марий-влакын мурен-куштымашышт гыч ик мотор семже дене тавалтышна. Анатолий Ермаков писе парняж дене моткоч куштылгын шокталтыш. Кумыл нєлтшо, куштымо сем чылаштлан келшен, витне.

Юрий Кудрявцев шке сылне йӱкан гармоньжо дене Медведево семым оҥарыш. Пӱжалт пытымеш ситыш. Тыге веселан Марий кас эртен кайыш.

Вот могай виян сем-влак улыт, чыла нойымет, оккӱл шонымашат ала-кушко шулен каят. Кап-кыл куштылемын, кєргышто ала-могай куан тул шижалтеш. Таҥватемлан манам, пеш сай, чонемак каныш. Вес арнян адак толына, мом мӧҥгышто шинчаш. Тудат тыгак вашештыш.

Толза Марий касыш кушташ-мураш.  Каныза, икте-весылан куаныза. Вет ик гана илена!

Кугурем Лариса.