Тора гыч толшо уна-влакым кинде-шинчал дене вашлийме йӱлам эртарымеке, Марий Эл Республикысе Тӱвыра, печать да калык-влакын пашашт шотышто министр Константин Иванов ден Россий Йотэл паша министерствын Йошкар-Оласе ӱшанъеҥже Полушина Лариса саламлымаш мутым каласеныт да «Славянка» ансамбльым вуйлатыше Гладкевич Кристина ден Белыничи кундемысе рӱдӧ клуб системым вуйлатыше Кондратьева Светланалан таумут ден шарнымаш пӧлекым кучыктеныт.

Пайремым «Памашшинча» калык семӱзгар ансамбль ден «Эреҥер» калык муро ансамбль сӧрастареныт. Умбакыже сценыште «Сударыня» ансамбль мурен-куштен. Икмыняр татлан ончаш толшо-влак пуйто Беларусь кундемышке логальыч, вет лачак тусо калыкын мурыжо-влак йоҥгеныт.

Концерт программе пытымеке, сценышке Республикысе руш тӱвыра рӱдерын вуйлатышыже Наталья Наумова ден белорус калыкын Марий Элыште ӱшанъеҥже Вера Новик лектыныт да уна-влакым пайрем дене саламленыт, пӧлекым пуэныт.

Мероприятий уна-влакын ончаш толшо-шамыч дене ваш мутланымышт дене мучашлалтын. Шагал огыл йодыш лийын да вашмут йоҥген.

Пайремышке министерстве пашаеҥ-влак, Йошкар-Олаште илыше тӱрлӧ калык диаспорлан вуйын шогышо-влак, Марий тӱвыра рӱдерын вуйлатышыже Римма Юрьева да молат ушненыт.

Ушештарыман, 2018-ше ийыште Марий Эл ден Беларусь коклаште Пырля пашам ыштыме нерген келшымойышко 5 ийлан кидым пыштыме.