Тудо поро йӱла почеш марий писатель, мер пашаеҥ Сергей Чавайнын чапкӱжӧ воктене тӱҥалын. Акцийым Оньыжа Эдуард Александров почын да Талешке кечын марий илышнам вияҥдарен колтымаште кӱлешлыкшым палемден. Тыгак Кугыжаныш Погын вуйлатышын алмаштышыже Анатолий Иванов, мер ушем-влакым вуйлатыше-влак, М.Шкетан лӱмеш Марий драме театрын режиссержо Василий Пектеев, регионла гыч толшо меръеҥ-влак ойленыт, кугыжаныш кучемыште, сымыктыш, тӱвыра, шанче пашаште ойыртемалтше еҥ-влакым шарналтен, пеледыш аршашым пыштеныт.
Марий тӱвыра рӱдерын пашаеҥже-влак марий профессионал музыклан тӱҥалтышым пыштыше И.С. Палантайын да писатель, марий калыкын эртык илышыжым сылнымут гоч почшо А.С.Крупняковын чапкӱшт, «Шарнымаш пушеҥге» ончылно пеледыш аршашым пыштеныт.
«Талвий» сылнымут марафон Российысе театр идалыклан пӧлеклалтын. Тушко М. Шкетан лӱмеш Марий драме театрын пашаеҥже, МарКУ-н да культур да сымыктыш колледжын студентше, «Саскавий» ӱдырамаш ушемын еҥже-влак ушненыт. Театрын артистше-влак марий сылнымутын классикше М. Шкетанын, режиссер Сарра Кириллован, драматург-влак Констанин Коршунов, Сергей Николаевын, Миклай Рыбаковын, артист-влак Йыван Кырлан, Майя Романован, Степан Кузьминыхын, Елена Сошникован, Виктор Бурлаковын илышышт гыч оҥай историйым каласкаленыт, студент-влак пьесыла гыч монологым, почеламут-влакым лудыныт.
Чарла Кремльыште «Мый марий йылмым тунемам» викторине-модыш икымше гана эртаралтын. Тушто кыдалаш да кӱшыл тунемме заведенийлаште марий огыл студент-влак, ныл командыш чумырген, марий йылмым, калыкын историйжым палымыштым ончыктеныт. Викторине-модышыш ушнышо кажне участникылан сертификатым да пӧлекым, сеҥышыш лекше команде-влаклан дипломым кучыктымо.
«Мый марла ойлем» акций кугурак да самырык тукымым ушен. Модмаш, марий муро да почеламут-влаклан поян лийын. Марла кутырен моштышо вес калыкын ӱдыр-эргыже-влак лудыныт. Артист-влак Иван Соловьев, Алексей Юнусов, Валерий, Светлана Яндукова, Марина Воронцова, бард мурызо Геннадий Григорьев, «Кас сем» группо, самырык мурызо Алена Мельникова муро аланым сылнештареныт.
«Российысе марий-влак» федерал калыкле-тӱвыра автономийын Советшым вуйлатыше, Россий президент пеленсе калык-влак кокласе кыл шотышто советын еҥже Лариса Яковлева, Пошкырт Республик Калык-влак келшымаш пӧртын тӱҥ методистше Алексей Ибулаев Марий тиште кече дене «Мый марла ойлем» акцийыш ушнышо-влакым саламленыт. Палемдыман, тушко марий самырык тукым веле огыл, тыгак вес калыкын ӱдыр-эргыже-влак ушненыт. Тыгак Марий форумын шошымсо сессийыш районла да регионла гыч толшо делегат-влак лийыныт.
Акций деч вара Марий самырык театрын артистше-влак драматург Зинаида Долгован «Немыч вате» пьесыжым ончыктеныт.
Марий тӱвыра рӱдер Марий талешке кечылан пӧлеклалтше мероприятий-влакым ага тылзыште шуя. Кугу Сеҥымашын 74-ше идалыкше лиеш. Ачамланде сарыште Марий кундем гыч 131000 утла еҥ сарыште участвоватлен, тышеч пелыже наре тушан вуйыштым пыштеныт. Нунын подвигыштым ме шарнен илена.
8 майыште Чарла Кремльыште «Мы помним. Ме шарнена» республикыысе бард муро да сылнымут фестиваль руш да марий йылме дене сар да патриотический темылан возышо автор ден мурызо-влакым уша. Палемдыман, тений тудо кокымшо гана эрта. Фестиваль Чарла Кремльышите 17 шагатлан тӱҥалеш.
9 майыште Чарла Кремльыште «Тау тылат, салтак!» концерт-акций лиеш, 12 шагатлан тӱҥалеш. А кастене, 17 шагатыште, тыштак «Марий кас» кеҥежымсе тургымжым почеш.
