Фестиваль Йошкар-Олаште улшо ятыр усталык ушем ден клуб-влакым чумырен. Тиде – «Кас сем», «У муро» вокал группо-влк, «Пегас» поэзий клуб, «Гармония» усталык ушем, «МИА» студий.

Ончаш толшо калык кумдан палыме бард-влак Константин Шемякинын, Геннадий Григорьевын, Геннадий Куклинын, «МИА» студийын солистше-влак Снежана Королева ден Элина Семенован, тыгак Марта Мальгинан, Александр Мамаевын, Ольга Якимован, Валерий Чивановын, Валерий Александровын, Валентина Булыгинан муралтымыштым шулен колыштыныт. А почеламутшо мыняр шуко да тӱрлӧ шӧрынан йоҥген; военный  да патриотизм теме чапым налше автор-влакынат, самырык возышо-влакынат чоныштышт сескемалт ила да шӱмым тарватыше корныла дене лудшо деке шуэш. Почеламутым лудаш йӧратыше-влакат марий поэт-влакын сар нерген возымыштым сылнын лудын пуэныт.

Фестивальыште кугу уна семын писатель Аркадий Крупняковын Сергей эргыже толын. Сергей Аркадьевич ачаж семынак писатель, драматург, Севастополь олаште ила. Тудо фестивальлан кугу акым пуыш, самырык тукымым патриотизм шӱлышеш куштымаште надыржым палемден коден.

Фестивальын участникше-влак ончыкыжымат тыгаяк формат дене мероприятийым эртараш кӱлмым палемденыт.