Самырык-влак Валентин Колумбын почеламут-влакшым лудыныт, семлан келыштарыме корнылажым муреныт. Оласе «Колумб лудмаш» поэзий конкурсым Республикысе марий тӱвыра рӱдер, Йошкар-Ола администрацийын тӱвыра да туныктыш виктемышт эртареныт. Таҥӱчышыш 19 еҥ ушнен.
Поэзий конкурсым Марий тӱвыра рӱдерым вуйлатышыже Римма Юрьева тыланымаш дене почын. 13-шо №-ан кыдалаш школын тунемшыже, кодшо ийыште конкурсышто сеҥыше, Кристина Краснова библиотекын Литератур залыштыже улшо В.Колумбын портрет ончыланже пеледышым пыштен. Марий Эл Республикын калык артисткыже Зоя Берникова да Марий Элын сулло пашаеҥже Родион Алексеев В.Колумбын мутшылан композитор В.Захаровын возымо «Йошкар-Олаем» мурыжым йоҥгалтареныт. Тыгак марий бард-влак Геннадий Григорьев ден Геннадий Куклин шке мастарлыкыштым ончыктеныт, у муро-влак дене куандареныт.
Поэзий конкурсым Марий Эл Республикын сулло артистше Раисия Данилова, Марий Элын калык поэтше Геннадий Сабанцев да Марий Эл Республикын сулло журналистше Лидия Семенова «Сылнымут» да «Сем» номинацийлаште, ийгот шотым ончен, акленыт. Тыге «Сылнымут» номинацийыште сеҥышыш лектыныт:
12 ий марте: 1-ше верым 7-ше №-ан кыдалаш школ гыч Егор Галкин налын, 2-шо вер дене 14-ше №-ан гимназий гыч Мария Васильева палемдалтын, 3-шо вер 14-ше №-ан гимназий гыч Диана Смоленцеван.
12 гыч 16 ий марте: 1-ше верым 13-шо №-ан кыдалаш школын тунемшыже Кристина Краснова налын, 2-шо вер 29-ше №-ан кыдалаш школ гыч Карина Рослякован, 3-шо вер 14-ше №-ан гимназий гыч Екатерина Александрован.
16 ий гыч кугурак ийготан-влак радамыште И. С. Палантай лӱмеш Республикысе тӱвыра да сымыктыш колледжын тунемшыже-влак таҥасеныт: 1-ше вер Андрей Алексеевын, 2-шо вер Светлана Ведерникован, 3-шо вер Анастасия Секретарёван.
«Сем» номинацийыште Семёновка селасе кыдалаш школын тунемшыжым Ольга Пакеева пӧлек дене палемдалтын.
Шке возымо почеламутым Калыкле президент школ-интернат гыч Полина Бирюкова ден Диана Никитина лудыныт. «Ямде лий» газетын тӱҥ редакторжо Лидия Семенова нунылан шарнымаш пӧлекым кучыктен.
Тыгак чыла участник-влак тыглай Диплом дене суаплалтыныт, а туныктышо-влак – Таумут дене.
Жюри палемден: «Колумб лудмаш» конкурс поэзийым йӧратыше-влакым иктеш уша да марий литератур деке шӱмаҥда. Тидыже кугу куан!»
Сеҥыше-влак 9 июльышто Морко районысо Унчо кундемыште эртаралтше «Колумб лудмаш» регион-влак кокласе финн-угор литератур фестивальыште мастарлыкыштым ончыктат.
