Тиде сценыште ойыртемалтше, шке паша дене ончык лекше, чолга еҥ-влаклан ятыр таумутым кучыктеныт. Константин Иванов Республикысе Марий тӱвыра рӱдерын пашаеҥже, бард-мурызо Геннадий Григорьевым Марий Эл республик вуйлатыше деч таумут дене палемден. Лариса Яковлева Пеледыш пайремышке толшо усталык коллектив вуйлатыше-влаклан тыгак таумутым, да тыгак пӧлекым кучыктен. Эдуард Александров мер пашаште чолгалыкым ончыктышо-влакым ӧрдыжеш коден огыл. Мер Каҥаш лӱм дене Людмила Артаскина Курыкмарий район гыч, Николай Сидоркин У Торъял район гыч палемден.

Кумда марий тӱнян кугытшым республикысе да тӱрлӧ кундемласе усталык коллектив-влак палынак ончыктеныт. Вет кажне ансамбль шке велысе такмакшым мурен, шке велысе куштымашым куштен ончыктен, а марий тувыржо кажнын тӱрлӧ лийын. Концерт пеш поян да куандарыше лийын, ончышо-влак чӱчкыдын кушташ лектыныт, совым рӱж кыреныт.

Концертын ужашыштыже «Эн сай кудо» конкурс-ончерыште сеҥыше-влакым ойыреныт.

Сеҥышышке лектыныт:

1 вер — Морко район;

2 вер — Провой кундем;

3 вер— У Торъял район.

Чыла районлан кучыктеныт «Акашево» лукмо кочкышым.

Тыгак Мер Каҥашын еҥже Игорь Эштуков ден мер активист Надежда Ильина «Эн мотор марий вургем» конкурсышто сеҥыше-влакым палемденыт. Григорий Иванов Марий Турек гыч, Татьяна Виссарионова Морко кундем гыч шарнымаш пӧлекым налыныт.

Надежда Тимофеева