«Салам, школ!» поро кумылым ончыктышо акцийыш рӱдерын пашаеҥже ден чыла кумылан еҥ-влак ушненыт. Тудым кажне йоча у тунемме ийын икымше кечыжым куан дене вашлийме шонымаш дене эртарыме. Марий тӱвыра рӱдер деч пӧлекым Йошкар-Олаште илыше Оксана Бухатина ден Елена Кислицинан шуко шочшан ешыштлан кучыктымо.
Шинчымаш кечылан пӧлеклалтше этнодискотекыш самырык-влак веле огыл, кугурак ийготан-влакат толыныт. Марий эстрадын артистше-влак Вадим Краснов, Роза Искакова, Геннадий Григорьев, Геннадий Куклин, Полина Савельева, Эльвира Петрова, ВАЛЕРИЙ, «Юкече» йоча ансамбль, Алексей Юнусов пайрем касым сӧрастареныт.
Марий мурым да куштымашым йӧратыше-влакым 2-ше идымыште марий касыш пагален ӱжына. Чарла Кремльыште 18 шагатлан тӱҥалеш.
