Марий калыкын ожнысо ӥӱлажым илышыш шыҥдарыме да кызытсе марий самырык тукымым калык йӱла деке шӱмаҥдыме амал дене «Ӱдырсий» конкурс тений республикыште нылымше гана эрта.

Регион-влак кокласе конкурсыш 18 ияш гыч 25 ияш марте ӱдыр-влак ушнат. Нунын «пурла кидышт» йолташыже, родо-тукымышт, ансамбль-влак лийын кертыт.

Конкурсантке-влаклан ныл заданий лиеш. «Мый марий ӱдыр улам» йыжыҥыште 5 минут жапыште нуно шкеныштын «МЫЙ»-жым почын пуат. Мӧҥгысӧ паша кышкарыште марий сӱан гыч ойыртемалтше ик йӱлажым але татшым ончыктат.

Марий ӱдыр-влак ожнысек поян вургемым ыштен моштеныт. Кажне кундемын, эсогыл ялын тудо ойыртемалтше улыт. Конкурсантке-влак тиде ойыртемым «Этномодо» таҥасыште почын пуат.

Марий калыкын эртыкшым, йӱлажым, тӱвыражым, сылнымутшым палымашым тергыше уш-акыл конкурс лиеш.

Конкурсыш ушнышо-влак йодмашым 21 октябрь марте Республикысе марий тӱвыра рӱдерын электрон почтыш (mari-centr@mail.ru) колтат але 8 (836)2 45-88-51 дене йыҥгыртат.

Конкурсыш ушнышо-влак 21 октябрь марте марий вургем дене войзалтме кум фотоштым, шкешт нерген кӱчык информацийым Республикысе марий тӱвыра рӱдерын электрон почтыш: mari-centr@mail.ru але 8 (836)2 45-88-51 телефоныш колтат. Нуным марий тӱвыра рӱдерын официал сайтыш (mari-centr.ru), «Марий тӱвыра рӱдер»  группын «вконтакте» (https://vk.com/marityvraryder), «одноклассники» (https://ok.ru/group/53545041395810) социал кылыш вераҥдат.

21 гыч 31 октябрь марте Интернет-йӱклымаш эрта. Эн шуко йӱкым погышо конкурсантке «Ончышо-влакын симпатийышт» приз дене палемдалтеш

.