Касыш канаш толшо еҥ-влак нунын шоктымышт почеш мурен-куштеныт веле огыл, пашаштлан акым пуэныт. Нуно эн шуко йӱкым самырык гармоньчо Игорь Смирновлан пуэныт. Кокымшо верым Шернур район Марисолаш шочын-кушшо Лева налын. Советский район Ургакш поселко гыч Эльвира кумшо верыш лектын. Кумылаҥдыше пӧлек дене Йошкар-Ола гыч Эльвира Петрова ден Слава Корнев палемдалтыныт.
«Марий касыш» толшо-влак коклаште кажне гана ӱжмаш-влак модалтыт. Кок еҥ 24-ше кылмыште эртыше пайремыш туак пурталтыт. Тыгак ик пиалан еҥ Марий самырык театрыште «Сӧсна поминка» спектакльыш ӱжмашым налын. Ончыкшымат модмаш-влак эртаралташ тӱҥалыт.
Тидымат палемдыман, «Марий сийгудо» ресторанын администрацийже «Марий кас» эртыме жаплан кочкыш йӧрварым шулдырак ак дене ужала.
24-ше кылмыште пайрем кас Аван кечыжлан пӧлеклалтеш.
