Тений тиде ковыралыкым эн ончыч республикысе школлаште марий йылмым палыше да тунемше йоча-влак акленыт. Кумшо ий тиде театрыште Марий Эл вуйлатышын ёлкыжо эрта. 20-шо телым икымше ёлко марий йылмым да тӱвырам тунеммаште сай результатым ончыктышо тунемше-влаклан пӧлеклалтын ыле. 200 йочалан ӱжмашым кучыктымо.
Марий Эл Виктер Вуйлатышын икымше алмаштышыже Михаил Васютин йоча, туныктышо да пайремыш толшо-влакым саламлен.
«Таче тиде кож йырыште чолга, марий йылмым сайын палыше йоча-влак погыненыт. Шарныза, ме тендан дене моткоч кугешнена. Вет те шке кумылын шочмо йылмынам тунемыда. Марла пелештен, марий мурым муралтен, марий сем почеш тавалтен колтеда. Шочмо йылмынан ончыкылыкшым тендан дене кылдена. Тыланда тунеммаште сеҥымашым, ача-ава, туныктышо-влаклан пенгыде тазалыкым тыланем. Умбакыжат шке моштымашдам шуарыза», – палемден Михаил Зиновьевич.
Республикысе марий тӱвыра рӱдер марий пайремын изи унаже-влаклан «У ий чодырасе йомак-влак» спектакль сынан мероприятий дене куандарен. Йоча-влак шкештат интермедийыш куштылгын пуреныт. Теве Килемар район Юксар гыч кум ош йӱксӧ вувер кувалан поро айдемыш савырнаш полшен огыл, шонеда?! А Марий Турек район Сардаял гыч толшо «попугай» малтен колтымо Лум ӱдырлан кынелаш шкенжын сын-капше денак полшен. Марий ёлкыш йоча-влак чинче-вунчо дене сӧрастарыме марий тувыран толыт, тидыже кажне йочалан «У ий марий чием» конкурсыш ушнаш да сеҥыше радамыш логалаш йӧным пуа. Теният тыгак лие: Сардаял школын тунемшыже Алексей Егоров икымше вер дене палемдалтын.
«Попугай вуйым поролон гыч авам дене коктын ыштенна», – палемдыш тудо.
Юксар кундемын кум «йӱксыжӧ» Дарья Макаева, йыгыр пелаш Виктория ден Марианна Соколовамыт «У ий марий чием» конкурсышто кокымшо верыш лектыныт. Кумшо вер Морко ӱдыр, самырык скрипачке Полина Мамаевалан шыргыжалын.
«У ий открытке» конкурсыш 28 паша пурен. Кажне сӱретыш йоча шке мастарлыкшым, илыш умылымашыжым ийгот кӱкшытшӧ гоч почын. Калыкле Президент школ-интернатыште тунемше-влак изинек кидмастар кушкыт. Нуно ёлкыштымат марий тӱран модыш дене сӧрастареныт, открыткым компьютер йӧнлан эҥертен ыштеныт. 5 «б» ден 6 «б» класаалаште тунемше-влакын тӱшка пашашт икымше вер дене палемдалтын (вуйлатышышт Н.А. Воронцова ден Т.М. Орлова).
Козьмодемьянск оласе «Дарование» школ-интернатын тунемшыже Анастасия Рыбакова кокымшо верыш лектын. Волжский район Мамасево кыдалаш школ гыч Алексей Дмитриев кумшо вер дене палемдалтын.
Сеҥышыш лекше кажне йочалан дипломым, пӧлекым кучыктымо.
Марий ёлкыш толшо кажне тунемше Йӱштӧ кугызан шере пӧлекше дене каен. Тыгак марий писатель, теҥыз офицер Василий Краснов нуным пайрем дене шокшын саламлен, тунеммаште да школ илышыште чолгалыкым тыланен да «Ямде лий» газетын уста юнкоржо-влаклан пӧлекым кучыктен.
Республикысе курчак театрын артистше-влак йоча-влаклан калык фольклор да йомак негызеш А.Н. Афанасьевын да В.И. Дальын «Лӱмудыр» спектакльын премьерыжым ончыктеныт. Тамле кочкышым ыштымеке, тунемше-влак пайрем тӱсан Йошкар-Олам ончен савырненыт.
