Уремыште лум уке гынат, марий мастар-влак У ий кож йырым сорастарымаште чот тыршеныт: 2020 ийын символжо – колям да колым ий гыч пӱчкеден шогалтеныт. Йоча-влаклан шылмыла модаш оҥай лабиринтым чоҥеныт.

Сценыште Марий Эл Республикын калык артистше-влак Александр Егошин ден Светлана Дмитриева, Марий Элын сулло артистше Вера Соболева, О. Ипай лӱмеш Кугыжаныш самырык-влакын премийын лауреатше, мурызо да самодеятельный композитор Светлана Яндукова, бард-мурызо Геннадий Григорьев, театрын артистше Алексей Юнусов весела мурыщт дене пайрем кумылым пӧлекленыт.

«Чон оҥгыр», «Мурпеледыш», «Ший полан» фольклор ансамбль-влак марий калыкын пайрем муро поянлыкын ямже дене палдареныт.

Республикысе марий тӱвыра рӱдер вуйлатышын алмаштышыже Василий Петров чылаштым У ий пайрем дене саламлен, пеҥгыде тазалыкым, поро илышым тыланен.

Йӱштӧ кугыза да Лум ӱдыр дене пырля кож йыр пӧрдыныт, мурым муреныт, куштеныт.