Меж гыч ышташ молан тунемаш лиеш – тыште чылажымат мастар-класслаште йоча ден кугыен-влак ончыктеныт. Парнягутыш портышкемым, калып дене йӧрыме теле йолчиемым, нуным сӧрастарыме йӧн-влак дене кажныжым палдареныт. Ялысе ковай-влак дене пырля тунемше-влакат межым шӱдырымӧ, мундыраш пӱтырымӧ да пижергым пидме кидпаша дене мастарлыкыштым почыныт. Калык модыш-влак пайремлан келшыше лийыныт да тудым сылнештареныт.

Фестивальыште Марий Эл Республикын Кугыжаныш Погын депутатше-влак Наталья Пушкина ден Лариса Яковлева лийыныт да тунемше-влакым кугезе коча-кован годсо йӱла пашам тачысе кечын «шинчаончалтышыж» гоч ончыктен моштымылан организатор-влаклан тауштеныт.