Тушко финн-угор калык-влак гыч лекше, шочмо йылмым йӧратыше да пагалыше чолга ӱдыр-рвезе-влак: Ханты-Манси автоном йырвел Югра гыч Марина Сенгепова, тиде вел гычак мемнан марий поэтесса Раисия Сунгурова, Коми республик гыч Николай Удоратин, Одо кундем гыч — Полина Куликова ден Лукерья Шихова да Марий Эл гыч Андрей Чемышев ден Надежда Тимофеева погыненыт.

Тиде лагерьыште Википедий интернет-лаштыкыште шке шочмо йылме дене материалым возаш да кӱлеш семын шындаш тунемыныт. Википедийыште эстон йылме дене чолган возышо Иво Круусамаги специалист семын Википедий да Викимедий проект-влак дене пашам ышташ туныктен. Тыге вич кечыште ханты, коми, одо, марий да эстон йылме дене ятыр статья-влак лектыныт, фотографий-влак пурталтыныт.

Тӱрлӧ семинар да практик паша деч посна викилагерьыш толшо-влак верысе тӱвыра да илыш шот деке лишкырак лийыныт, шке шочмо калык верч тыршыше чолга еҥ-влак дене вашлиймашышке ушненыт. Тыге Сетомаа волостьышто, Выру олаште, Кютиорг лапыште оҥай вашлиймаш да мероприятий-влак эртеныт.

Викилагерьын организаторжо Финн-угор фильм-влакын фондышт (НКО ФУФФ) улеш. Эдина Чюллог ден Анти Наулайнен финн-угор йылме-влак дене кином, Википедийым да моло пашамат вияҥден колтымаште тыршат, шочмо йылмым арален кодаш шкешотан йӧным ыштат.

Википедий изи йылмылан интернетыште аралалт кодаш сай йӧн улеш, садлан интернет-лаштыкышкыже эреак возен шогыман!

Тимофеева Н.Н.