Ӱярня пайремым пеш веселан эртарат. Озавате-влак Ӱярнялан мелнам лыҥак кӱэштыт, вара ушкал ӱй дене шӱрат. Тыгак ӱячам, эгерчым, перемечым, тӱрлӧ кӧрган когыльым, ӱян туарам, шоҥешталтше пурам пайрем ӱстелыш ямдылат. Уна-влакын толмыштлан еш моткоч йывырта, молан манаш гын нуно пиалым конда манын ӱшанат.

Калык, мотор марий вургемым чиен, лыжга марий мурым йоҥгалтара, куштен, «шуршым почка».

Ӱярня годым марий-влак мунчалташ йолгурыкым ыштат. Ӱярняварам пыштен, мужырын-мужырын, вашла кидым кид кучен шогалын мунчалтат. Ӱярня арнян пытартыш кечынже, сурт-печыште погынышо куштырам поген йӱлалтат, тыге черым, ойгым йӱлалтен колтат. «Ӱярня каен! Вес ийлан адак тол!» манын кычкырен, тулото ӱмбач тӧрштылыт, ломыжшым пакчаш але пасуш шават.

Ӱярня модыш-влак шкешотан, таҥасымаш сынан улыт. «Шукыйол», «маскайол» дене таҥасен мунчалтат, «карта» дене модыт.

Пайрем арняште игечым тӱткын эскерат, пӱртӱс ончыкылык кеҥеж могай лийме нерген раш каласен.

Марий Ӱярня нерген тӱнямбалне кумдан палат. 2017 ийыште пайрем нерген видеосюжетым «Поедем, поедим» телепередачым вӱдышӧ Джон Уоррен войзен. 2018 ийыште Ӱярня «Российын вич эн оҥай масленицыже» радамыш пурталтын. Тиде ийынак Республикысе марий тӱвыра рӱдер «Марий пайрем, муро, фольклор» видеоколлекцийым луктын. Тушко «Ӱярня» пайрем нергенат методик сынан видеофильм пура. Тудо финн-угор калык-влакын визуал искусствыжын «Туйвеж» 6-шо тӱнямбал фестивальыште специальный приз дене палемдалтын.

Кугезе коча-кована-влакын шот-радам дене эртарыме пайремжым ончыкылык тукымлан туныктымо амал дене Марий тӱвыра рӱдер кудымшо гана «Йоча Ӱярня» республикысе мероприятийым эртара. Тудо 29-ше пургыжышто Волжский район Пӧтъял кыдалаш школышто эртаралтеш. 1 мартыште Йошкар-Оласе рудӧ каныме паркыште марий пайрем гӱжлаш тӱҥалеш.