Пайремын организаторжо-влак тунемше-влакым мероприятийыш районласе школ вуйлатыше-шамычым кондашак темлат, молан манаш гын марий тӱвырам, калык йӱлам да фольклорым икшывын шӱм-чоныш изинек шыҥдарен шогымо дене нунын шинчымаш кӱкшытыштым нӧлталаш мыняр-гынат полша, кугезе коча-кованан йӱлажым арален шогымаште пеҥгыде тошкалтыш семын кодеш. Мероприятий марий йылме дене эрташ тӱҥалеш.
«Йоча Ӱярня» пайрем 10 шагатлан тӱҥалеш. Кажне командыште 7 еҥ лийшаш.
Тунемше-влак коклаште конкурс-влак тыгай номинаций дене эрташ тӱҥалыт:
– «Ӱярня мелна» конкурс кочкышын вужгата да тамле улмыжо, эн моторын сӧрастарыме деч посна марий кочкыш нерген оҥайын каласкален моштымо аклалтеш.
– «Ӱярня кува», пайремын символжо, тыгайрак лийшаш: ик метр деч кужурак, чиктыме вургемже марий пайремын тӱсшылан да йӱлажлан келшыше лийшаш, лӱдыкшӧ деч кораҥме технике правил почеш «йолжо» пеҥгыдын шогышаш. Тыгак символын каласкален моштымаш аклалтеш.
Туныктышо, воспитатель, лудмывер пашаеҥ-влаклан Ӱярня пайремым йоча-влаклан эртарыме сценарий конкурс эртаралтеш. Текст марий йылме дене возымо лийшаш.
«Марий йӱла» квест-модыш марий калыкын йӱлаже да пайремже-влак нерген лиеш. Ребус, тушто, кроссворд да сканворд йӧн-влаклан эҥертен, йодыш-влакым ямдылыме. Тошто марий пайремын ю виян шӱлышыжым йоча-влак уремыште тӱрлӧ марий модмаш гоч пален налыт. «Шукыйол», «маскайол» дене таҥасаш тӱҥалыт, курык гыч ӱярнявара дене мунчалтат, калык модыш-влак дене модыт.
Конкурслаште сеҥыше-влак диплом да шергакан приз дене палемдалтыт.
Район да школла гыч йодмашым 19-ше пургыж (февраль) марте тыгай адрес дене вучена: г. Йошкар-Ола, Первомайский ур., 109 пӧрт, 115-ше каб., e—mail: mari—centr@mail.ru, тел. (8362) 45-88-51.
