«Мари ушем» регионысо мер ушем вуйлатыше Василий Петров мероприятийыш погынышо-влакым Шошын эн первый пайремже дене саламлыш да Унчо ял илем шотан вуйлатыше Иван Евсеевлан ял илышым тӱзатен шогымаште ыштен шогымыжлан тауштыш.
Мероприятий Унчо кундемын шочшыжо, Марий автономийым ыштымаште кугу вийым пыштыше Иван Петровын марий тӱнялан надырже да тачысе жаплан суапле корныжо нерген В.М. Васильев лӱмеш МарНИИЯЛИ-н этнографий пӧлкам вуйлатыше, историй шанче кандидат Никандр Семенович Попов каласкалыш. Марий шанчызе пуымо ятыр тура йодышлан тыгак туран вашештыш, молан манаш гын тачысе илышысе да шӱдӧ ий ончыч нӧлталтме йодыш-влак иксемынак чоным вургыжтарат.
«Марий тӱр» рӱдерым вуйлатыше Ираида Александровна Степанова марий ӱдырамаш ден марий тӱр коклаште ойыраш лийдыме улмыштым палемдыш. Профессионал семын тудо кажне тӱрын вий-куатше нерген умылтарыш. Марий тӱр – тиде шкешотан искусство,
Кумшо йодыш «Мари ушемын» тамгаже дене кылдалтын ыле. Тудым тӱҥ шотышто Унчо кундемыште тӱрлат. Мом тудо ончыкта, кузе «лудын» мошташ? Нине йодыш-влакланат погынышо-влак тичмаш вашмутым муыч.
Марий поэт, Морко кундемын шочшыжо Аркадий Букетов-Сайнын ӱдыржӧ, Галина Аркадьевна, шочмо-кушмо вер-шӧржӧ нерген кугешнен каласкалымыже «йыргешке ӱстел» йыр погынышо-влаклан ача-ава суртым да лишыл пощкудым порын шарналташ да миен толаш кӱлмым шижтарыш.
«Мари ушем» регионысо мер ушем тӱвыра да шинчымашым пойдарыше мероприятийым Республикысе марий тӱвыра рӱдерын, меръеҥ-влакын полшымышт дене пырля эртарыш.
Ӱшанена, тыгай вашлиймаш-влак моло район ден олаштат эрташ тӱҥалыт.
