Марий меръеҥ-влакын темлымышт да тӱҥалтышышт почеш уже икмыняр ий Йошкар-Олаште, районлаште да марий калык илыман кундемлаште «Талешке сорта» акций эртен. Кызытсе, оккӱл черлан кӧра лийше ситуаций мӧҥгыщтӧ шинчаш йодеш, пашаш огына кошт, дистанционно веле пашам ыштена.

Тидым шотыш налын, Марий тӱвыра рӱдер «Талешке сорта» акцийым онлайн да офлайн йӧнлан эҥертен эртараш темла. Онлайн-акцийыш кеч-кушто илыше чыла марий еҥ ушнен кертеш. Тидлан, мӧҥгыщтӧ сортам чӱктен, марий эртыкыште кугу кышам кодышо, марий калыкым чапландарыше-влакым шарналтен ойлыман да тиде татым видеош войзыман. Видеороликым Марий тӱвыра рӱдерын электрон почтышкыжо але рӱдерын «вконтакте» тӱшкашкыже колташ кӱлеш. Лекше йодышым 8-917-706-13-34 телефон дене рашемден кертыда.

«Талешке сорта» онлайн-акцийыш ушнен, марий калыкнам жаплыме, шочмо йылмынам аклыме, тӱвыранам да йӱланам вияҥдыме корным самырык тукымлан почына. Видеороликым 24 апрель кас марте вучена. Ӱшанена, марий талешкына-влак нерген кугешыме кумылыштым почшо радам кӱжгӧ лиеш.

«Талешке сорта» онлайн-акций 26-шо вӱдшорышто 7 шагат эрдене тӱҥалеш. Марий тӱвыра рӱдерын «вконтакте» тӱшкаштыже ужын кертыда Адресше тыгай: https://vk.com/marityvraryder.