Марий Элыште, марий калык илыман вес кундемлаште марий талешкына-влак лӱмеш сортам чӱктен шарналтымаш, памятник, шарныктыш оҥа ончылан пеледыш аршашым пыштымаш поро йӱлаш савырнен.

Кызытсе туткар иквереш погынаш огеш кӱштӧ, сандене суапле сомылнам онлайн йӧн дене эртарен колтена. Ӱшанем, 26-шо вӱдшорышто, 7 шагат эрдене, кажне марий ешын суртышто Талешке сорта чӱкталтеш да ушан, шотан-ратан, калыкнан эрыкшым, йылмыжым, тӱвыражым, йӱлажым арален кодымо, тукымнам вияҥден колтымо верч чолга марий-влакым пагален уштена.

Ме огына мондо шке талешкына-влакым: Полтышым, Мамич-Бердейым, Онарым, Акпатырым, Чоткарым, Пашканым. Нунын нерген легендым, мурым да каласкалымашым тукым гыч тукымыш шарена. С. Черняков, И. Петров, В. Мухин, С. Чавайн, Й. Кырла марий историеш келге кышам коденыт.

Ме герой-фронтовик-влакын, тылыште тыршыше-шамычын, республикынан вияҥмашкыже кугу надырым пыштыше, марий калыкын чон да культур поянлыкшым арален кодаш да тудым шукемдаш полшышо чолга да уста еҥ-влакын лӱмыштым эре кугешнен ойлаш тӱналына, нунын подвигыштлан вуйым савен, нунын патырлыкышт да кӧргӧ вийыштым, патриотизмыштым пагален илена да кушкын шогышо тукымым нунын примереш шуарен шогена.

Чылаланда, пагалыме родем-влак, пеҥгыде тазалыкым, кужу ӱмырым, вашла пагалымашым да пиалым тыланем.

Республикысе марий тӱвыра рӱдерын вуйлатышыже, Марий Эл Республикын Кугажаныш Погынжын депутатше Н.В. Пушкина