Тушко Йошкар-Ола, Волжск ола, Волжский, Советский, Куженер, Морко районла гыч тӱвыра, туныктымо сферылаште, муниципал пашаште тырщыше-влак, школлаште да вузлаште тунемше-шамыч ушненыт.

Нуно марий калыкын эрыкше верч шогышо Марий Талешке-влак Чоткарым, Онарым, Иргам, марий кугыжанышым ыштымаште вийым да пеҥгыдылыкым ончыктышо И.П. Петровым, Кугу Ачамланле сарыште лӱддымылыкым да патырылыкым ончыктышо геройна-влак З. Прохоровым, О. Тихомировам, тукым кочашт да ача-аваштым шарналтеныт. Марий йылмым да сылнымутым вияҥдымаште кугу надырым пыштыше С. Чавайн, Я. Элексейн, Н. Лекайн, В. Колумб, Макс Майн нергенат поро мутым ойлымо.

Марий талешке кечын калыкнан 33 шочшыштлан моктеммутым пӧлеклыме.

Тиде кугу пашам Марий тӱвыра рӱдер умбакыже шуя: Кугу Сеҥымашлан 75 ий темме вашеш 1 гыч 9 май марте «Шарнымаш сорта» онлайн-акцийым эртара. Тудо уло марий тӱням авалтыше акций лиеш манын ӱшанена. Россий кумдыкын кажне кундемыште илыше марий-влак Кугу Ачамланде сарыште кугу лӱддымылыкым ончыктеныт. Нуным ме шарнен илышаш улына.