Концертым рӱдерын методистше Надежда Николаева вӱден. Тудым Олык Ипай лӱмеш кугыжаныш премийын лауреатше Светлана Яндукова тӱҥалын, пианино дене шоктен, «Марий Элем» шке возымо мурыжым йоҥгалтарен.
Пошкырт кундемын чолга, тӱвыра пашаеҥже, семмастар да мурызо Алексей Ибулаев шӱвыр дене шоктен мурымыж годым марий музыкант Павыл Тойдемарын Кугу Ачамланде сарыште шӱвыр дене шоктымыж дене шӱдӧ дене салтак ден офицер-влаклан тушман ваштареш лӱддымын шогаш таратымыже ушышкем тольо. Ольошнат шке марий калыкшылан кызытсе чер «сарым» шӱм-чон пеҥгыдылык дене сеҥаш таратыш.
Онлайн-концертыш самырык музыканче-влакын ушнымышт куандарыш. Игорь Смирнов, гармоньжым шупшылын, Параньга кундемысе «Поро кас» фольклор ансамбльын репертуарже гыч «Ух! Ах!» такмакым муралтен.
М. Шкетан лӱмеш Марий драме театрын артистше Алексей Юнусов, мурызо Валерий марий поэт ден композитор-влакын мурыштым йоҥгалтареныт, Гармоньчо Эльвира Петрова такмак-влакым шоктен-мурен.
Концертым 20 наре еҥ ончен. Ӱшанена, ончыкшым тиде чот ешаралтеш.
