Мураш кумылан кажне еҥым тушко ушнаш ӱжына. Кажне жапын шке мурыжо лийын. Тихон Ефремовын «Кынелза, шогалза», И. Палантайын «Йывырте» мурышт 20-шо курым тӱҥалтыште марий калыклан пеҥгыде тупрӱдан лияш туныктеныт. Илыш саемме дене муро-влакат веселарак, кумылым савырыше шочаш тӱҥалыныт.Ӱдыр-каче кокласе йӧратымаш тулын куатшым пӱртӱсын ямже гоч почын пуышо семйогын ятырак. Тидын годымак марий драматург-влак пьесылаштым муро дене сӧрастареныт.

Икманаш, эртыше курымышто шочшо марий мурпого памаш семынак йоргыкта. Мондалтдымыжым угыч калык коклаш лукташ, мондалтшыжлан калык чоныш корным почаш «Марий ретро муро» видеопроект полша.

Мураш кумылан кажне еҥым тушко ушнаш ӱжына. Профессионал артист-влакым, марий эстрадыште мургорным куралше-шамычым, мурым возышо да мурышо-влакымат. Икманаш, чылаштым, кӧ мурын йолташыже улеш.

Видеопроектыш Марий Эл деч посна, вес кундемлаште илыше мурызо-влакат ушнат манын ӱшанена.