Илыш дене тӧр ошкылнет гын, пашаште у йӧным кычалде огеш лий. «Илымет шуэш гын,  пӧрдаш тунем» — ойла калык. Сандене ме, Марий тӱвыра рӱдерыште ыштыше пашаеҥ-влак, уста марий калыкым шке йырна  чумырашлан, пашанам тӱрлӧ могырымат саемден да келыштарен,  виктарен колташ тыршена. Таче ме Марий тӱвыра рӱдерышке марий йылме туныктышо-влакым, «Уста туныктышо» ушемым,  тематический вашлиймашке ӱжын улына. Вет мемнан пашанан икгайлыкше шуко уло. Тиде  марий калыкын ныжылге, йомартле йылмыжым, ушан  илыш-йӱлажым,  поян ойпогыжым арален кодаш да чыла тидым шымлаш, аклаш, перегаш кушшо самырык тукымым кумылаҥден шогышаш улына. Тидым ме иквереш ышташ тӱҥалына гын, пашана вораҥын кая, манын шонем. Вет пырляште – вий.