Пайремым Марий Элыште илыше олыкмарий, эрвелмарий-влак пайремлат. Семык пайрем деч вара кеҥеж толеш, а кеҥежше кугезына-влакын тыглай огыл тӱняумылымашыже дене, еш кокласе илыш дене кылдалтын. Ожнысо йӱла радам тыгак мер калыкын илыш радамжым йӧнештарен колташ, родо-тукым дене пеҥгыде кылым кучен илаш полшен. Тудым кажне еш, тукым шуктышаш улмаш.

Вӱргече да изарня пайремын тӱҥ кечыжлан шотлалтыныт. Тунам вес тӱняш кайыше родыштым унала вучен вашлийыныт, мончашке пуртеныт, тукымышт дене пырля уштеныт, сортам чӱктеныт. Сийленыт, вара ужатен колтеныт.

Семык вӱргече йӱд осал вийын озаланыме жаплан шотлалтын. Тудо уда шоныш дене суртыш ынже логал манын, оза-влак сурт-печыште улшо чыла омсам кӧгӧн дене петыреныт, тулым ылыжтеныт, суртыштым ороленыт, йӱк-йӱаным луктыныт.

Кажне еҥ мончаште шкенжым тӱрлӧ кушкыл да шудо гыч ямдылыме выньык дене лупшен, кушкыл да шудо гыч ямдылыме вӱд дене кап-кылыштым шӱалтен. Самырык ӱдыр-рвезе-влак йӱдым олыкышто веселан эртареныт, эрдене веле мӧҥгышкышт толыныт.

Семык шуматкечын мучашлалтын, тынеш пурышо марий-влак рушарнян Трочын пайремым палемденыт. Шочмынжо мланде иланыме кече лийын, тунам мландым тӱкалаш чареныт.

Кызыт Семык фольклор фестиваль семын эртаралтеш.