Салам мут дене меръеҥ В. Кондратьева.

Санкт-Петербург ден Ленинград областьыште 1800 наре марий ила. Марий мер сомыл тыште 23 ий ончыч, землячествым ыштыме деч вара, куатым налын. «Ший корно» марий калыкле-тӱвыра автономийым почмо деч вара паша кугыжаныш кучем кӱкшытыштӧ эрташ тӱҥалын.

Ленинград область Всеволожский районышто «Пеледыш пайрем» ий еда эртаралтеш. 2017 ий гыч Калык-влакын келшымаш пӧртыштышт марий тоштер пашам ышта. «Югорно» мурышо да куштышо ансамбль 2016 ийыште чумыралтын, калыкле фестивальлаште да конкурслаште марий калыкын муро да куштымаш поянлыкшым ончыкта. Кодшо ийыште «Ший корно» марий автономий Россий Президентын грантшым сеҥен налын, марий тоштерын пашажым саемдымаште да марий калык йӱла, тӱвыра дене кылдалтше тӱрлӧ сынан мероприятийым эртарен колтымаште тудо – кугу полыш.

Автономийын эн суапле пашаже – Кугу Сеҥымашлан 75 ий темме лӱмеш «Мы вместе защищали Ленинград» шарнымаш книгам лукмаш. Тушко Кугу Ачамланде сарыште Ленинград мландым тушман деч пыштыше марий калыкын 4469 эргыже ден ӱдыржӧ-влакын лӱмыштым пуртымо.

Салам мут дене «Ший корно» марий калыкле-тӱвыра автономийын йыжъеҥже-влак.