2010 ийыште эртарыме перепись почеш, Российын 50 регионыштыжо марий-влак илат. Кажныште марий-влакна нерген поро мутым ойлат.
Алтай кундемыште 515 марий еҥ ила. Марий-влакын тӱшкан илыме верышт – Змеиногорский районысо Черепановский поселко. Регионышто «АлтайМари» калыкле-тӱвыра автономий пашам ышта. Тудым марий ачан ӱдыржӧ Татьяна Дмитриевна Рябова почын да пашам виктарен шога. «Ручеек» йоча марий ансамбльым чумырен, марий тӱвыра нерген Алтайыште илыше калык-влакым тӱрлӧ мероприятий гоч палдарен шога. Алтай кундемыште Волжский район Кабаксола ялеш шочын-кушшо Виктор Федерович Евдокимов Социалистический Пашан геройжо лӱм дене палемдалтын.
Салам мутым «АлтайМари» калыкле-тӱвыра автономийым вуйлатыше Т.Д. Рябова ойлен. Поселкышто илыше-влак 70 ий жапыште марий йылмыштым монден огытыл, чаткан шочмо йылмышт дене ойлымыштым колаш моткоч куанле.
