19 сентябрьыште «Усталык Чинчышер» фестиваль Старые Краи селаште эртен. Республикысе марий тӱвыра рӱдер пеленсе «У муро» вокал студийын, «Сото вий» фольклор ансамбльын солистше ден семмастарже-влак муро кумылыштым почыныт. Калык-влак кокласе йодыш дене Россий Президент пеленсе Советын йыжъеҥже, «Российысе марий-влак» Калыкле-тӱвыра федерал автономийын Советшым вуйлатыше Лариса Яковлева, Республикысе марий тӱвыра рӱдерын директоржо Наталья Пушкина фестивальын участникше ден уна-влакым саламленыт. Тонкино районышто марий илышым ворандарен колтымаште надырым пыштыше чолга марий меръеҥ-влаклан таумутым кучыктеныт.

20 сентябрьыште Татарстан кундем Набережные Челны олаште «Ме ик пушеҥгын укшыжо улына» («Мы ветви древа одного») финн-угор калык творчество фестиваль эртен. Лариса Николаевна ден Наталья Васильевна туштат лийыныт, погынышо калыкым саламленыт.

Фестивальыште марий, мордва, удмурт фольклор ансамбль-влак калыкыштын тӱвыражым муро, куштымаш да кочкыш гоч почын пуэныт.