Марий кугыжаныш шочмылан шӱдӧ да Пеледыш пайремым эртараш тӱҥалмылан ик курым теммылан пӧлеклалатше Россий кӱкшытан фольклор пайрем марий-влакын тӱшкан илыме тӱрлӧ регионла гыч да республикнан чыла гаяк районжо гыч участник, усталык коллектив-влакым ушен.

Тидымат палемдыман, пайремын организаторжо-влак пандемий шарлыме деч аралалташ чыла йӧным кучылтыныт. Чарла Кремльыш толшо кажне еҥын тепловизор дене температурыштым висыме, санитайзер дене кидыштым обработатлыме, маске дене пуртеныт.

Пайремым почмаш шкешотан, театрализаций йӧным кучылтын эртарыме. Тушто Пеледыш пайремнан 100 ияш йыжыҥжым почын пуымо.

 

Пайремыш чумыргышо-влакым эн ончычак марий онаеҥ-влак саламленыт. Тиддеч вара Марий Эл Виктерын председательжын икымше алмаштышыже Михаил Васютин, Федераций Советын тӱнямбал паша шотышто комитетшын председательже Константин Косачёв, Федераций Советын обороно да лӱдыкшыдымылык шотышто комитетшын икымше алмаштышыже Сергей Мартынов, Россий президент пеленысе калык-влак паша шотышто советшын йыжыҥъеҥже, Российысе марий-влакын федерал калыкле тӱвыра паша шотышто советым вуйлатыше, Марий Элын Кугыжаныш Погынжын депутатше Лариса Яковлева, республикын тӱвыра, савыктыш да калык паша шотышто министрже Константин Иванов, республикын ял озанлык да кочкыш сату шотышто министржын пашажым жаплан шуктышо Андрей Кондратенко саламлымаш мутым ойленыт,

Варажым тӱвыра, савыктыш да калык паша шотышто министрже министр К. Иванов тӱвыра, сымыктыш, науко да образований аланыште тыршен пашам ыштыше да мер пашаште чолгалыкым ончыктышо икмыняр еҥлан Тӱвыра, савыктыш да калык паша шотышто министерствын ямдылыме «Калык верч тыршымаш» медальжым кучыктен. Нунын коклаште Марий тӱвыра рӱдерын пашаеҥже-влак Василий Петров, Геннадий Сабанцев да Геннадий Григорьев лийыныт.

А концертше, концертше, марий кажне илемжын чон да йӱла поянлыкшым почын. Кумылым нӧлтышӧ муро, сылне сем Йошкар-Олам ӧрыктареныт. Марий калык кугезе коча-коважын семӱзгаржым арален шога, кажне марий пайрем тӧтретпуч, шӱвыр, тӱмыр да латкок басан гармонь деч посна огеш эрте. Тыге шӱм-чонжым кандара, кумылжым нӧлта, муралтен-тавалтен, нелыжым йолйымакыже тошкалын лаштырта.

Пайрем жапыште онлайн режимыште эртаралтше тӱрлӧ конкурсышто сеҥыше-влакым саламлышт.

«Кудо» конкурсыш чылаже 20 йодмаш пурен.

I вер – «Шуар кундем» фольклор ансамбль (Советский район); 

II вер – Роҥго тӱвыра пӧрт пеленысе усталык коллектив (Советский район);

III вер – «Шайра кундем» фольклор ансамбль ден Сотнур тӱвыра пӧрт (Волжский район).

«Мастар кид» конкурсыш республикына гыч веле огыл, Пошкырт кундем, Свердловск область да Моско гыч 28 кидмастар шке пашажым ончаш да аклаш луктын.

I вер – Светлана Попова (Параньга район);

II вер – Тамара Костина (Свердловск область);

III вер – Алексей Калинин (Волжский район)

«Шокталте гармонетым» конкурсыш 45 участник ушнен. Нуно Пошкырт кундем, Санкт-Петербург ола да республикнан тӱрлӧ районжо гыч лийыныт.

Солист-влак коклашт:

I вер – Геннадий Андреев (Марий Турек район);

II вер – Леонид Ермаков (Советский район);

III вер – Алексей Горинов (Шернур район).

Ансамбль-влак коклаште:

I вер – «Кумыл» ансамбль (Пошкырт кундем);

II вер – «Какшан сем» фольклор ансамбль (Оршанке район);

III вер – «Тымык кас» ансамбль (Кужэҥер район).

«Эх, марий вате» конкурсыш 26 ӱдырамаш ушнен.

I вер – Маргарита Милютина (Шернур район);

II вер – Надежда Корнева (Советский район), Зинаида Петрова (Волжский район);

III вер – Маргарита Тойшева (Йошкар-Ола), Светлана Васильева (Параньга район), Надежда Чемекова, У Торъял район.

Мотор пайремлан чевер кечыжат пуйто куанен, шыже кечын икымше кечыже эр гычак шыратен ончен, Пеледыш пайрем годсо семынак шокшо да йомартле лийын. Марий пайремланна, Ош Кугу Юмынажат йывыртен, чыла велымат йӧным ыштен.