Конкурсантке-влак «Мый марий ӱдыр улам» таҥӱчаш тапырыште шкеныштын «МЫЙ»-жым почын пуат. Мӧҥгысӧ паша кышкарыште шке кундемысе калыкын ойыртемалтше ик йӱлажым але татшым ончыктат. Марий ӱдыр-влак ожнысек поян вургемым ыштен моштеныт. Кажне кундемын, эсогыл ялын тудо ойыртемалтше улыт. Конкурсантке-влак тиде ойыртемым «Этномодо» таҥасыште почын пуат. Кажне заданийым видеош войзышаш улыт. Нунылан посна еҥ, ансамбль але родо-тукымышт полшен кертыт.

Видеоматериал могай лийшаш? Эн ончыч, конкурсын тематикыжылан келшен толшаш. Видеошто ойлымо, мурымо йӱк яндарын шоктышаш.

Конкурсыш пашам 27 октябрь марте колташ лиеш. Адресше: mari-centr@mail.ru. Ӱдыр-влак, пашадам вучена!

Таҥӱчаш мероприятийым Республикысе марий тӱвыра рӱдер ден «Российысе марий-влак» Калыкле-тӱвыра федерал автономий эртарат.