Ӱдырсий пайрем – мастарлыкым, йолӱмбак пеҥгыдын шогалме, ончыкылык илышлан ямде улмыжым ончыктымо йӱла жап. Тудым эртарыме пагыт – пасу пашам пытарымеке, икымше лум толмеке, шыжа ден кылме тылзыла. Республикысе марий тӱвыра рӱдер ий еда тиде пагытыштак, шыжа тылзе мучашыште, «Ӱдырсийым» палемден.
Ныл ий жапыште ӱдырын кид-йол мастарлыкшым, калык йӱлажым палымыжым аклыше пайрем сынан таҥӱчашыш Российысе кум регион, Марий Элысе шым район гыч 27 ӱдыр ушненыт.
– 2016 ий – Полина Савельева (Куженер район, конкурсын кугу призше (гран-приже)), Дарья Иванова (Морко район, «Марий йӱлалан чоным пуышо ӱдыр» номинаций), Анастасия Галиева (Татарстан Республикын Актаныш районжо, «Интернет марий ӱдыр» номинаций), Любовь Михайлова (Татарстан Республикын Агрыз районжо, «Шыма ӱдыр» номинаций), Анастасия Царегородцева (Звенигово район, «Мурызо ӱдыр» номинаций), Лариса Ипулаева (Башкортостан Республик, «Лывырге ӱдыр» номинаций).
– 2017 ий – Валентина Петрова (Курыкмарий район, конкурсышто сеҥыше, «Марий Пампалче» лӱмым налше), Марина Ведерникова (Оршанке район, «Марий ӱдыр — лывырге ӱдыр» номинаций), Кристина Кутузова (Марий Турек район, «Марий ӱдыр — сылне ӱдыр» номинаций), Ксения Григорьева (Звенигово район, «Марий ӱдыр – мастар ӱдыр» номинаций), Виолетта Георгиева (Морко район, «Марий ӱдыр – весела ӱдыр» номинаций), Елена Хлебова (Марий Турек район, «Марий ӱдыр – интернет ӱдыр» номинаций).
– 2018 ий – Ирина Зорина (Морко район, конкурсышто сеҥыше), Анжела Филиппова (Звенигово район, 2-шо вер), Мария Милютина (Куженер район. 3-шо вер), Карина Ямбарцева (Марий Турек район, «Саскавийын кресӱдыржӧ» номинаций), Вероника Мустаева (Шернур район, «Кугарня» газет, «Ончышо-влакын симпатий призышт» номинаций).
– 2019 ий – Татьяна Яковлева (Волжский район, кугу приз (гран-при)), Виктория Мамаева («Пампалче» номинаций), Ирина Салтыкова (Курыкмарий район, «Йӱксалче» номинаций), Ольга Мошкина (Йошкар-Ола, «Марий Эл газет, «Ушанче» номинаций), Розалия Осинова (Марий Турек район, «Семалче» номинаций), Виктория Мочалова (Оршанке район, «Шымалче» номинаций), Татьяна Батаева (Звенигово район, «Кумылналше» номинаций), Оксана Епанова (Советский район, «Тыматле» номинаций), Лиана Ямнеева (Морко район, «Сото вий» номинаций). Ныл ий жапыште «Ӱдырсий» регион кокласе таҥӱчашым Республикысе марий тӱвыра рӱдер, Марий самырык театр да «Саскавий» марий ӱдырамаш ушем Марий Эл Республикын тӱвыра, савыктыш да калык-влакын пашашт шотышто министерствын полшымыж дене эртареныт.
2020 ийыште «Ӱдырсий» регион кокласе таҥӱчаш ФАДН-ын (Калык-влакын пашашт шотышто федерал агентстве) окса полышыж дене лиеш. Грантым «Российысе марий-влак» калыкле-тӱвыра федерал автономий сеҥен налын. Кызыт регионла да Марий Элысе районла гыч йодмаш-влак пурат. Заявке ден видеоматериал-влакым кылме тылзын 10-шо кечыже марте тиде электрон адресыш: mari-centr@mail.ru – колташ лиеш.
