Таҥасымаш Марий Эл Республикыште калык-влак кокласе кылым пеҥгыдемдымашке виктаралтын. Тушко марий кундемысе калыкле-тӱвыра автономий ден ушем-влак ушнат. Кажне команде вич еҥым уша, шке лӱмжӧ дене выступатла.
Марафон кум тур дене эрта, кажне турын – шке темыже: 1-ше – Лӱмлӧ еҥ-влак», 2-шо – «Марий Эл Республик», 3-шо – «Калык-влакын йӱлашт да традицийышт». Кажне турышто команде-влак 10 йодышлан вашмутым пуат.
Йодмашым 3 ноябрь марте mari-centr_konkurs@mail.ru электрон адресыш колташ лиеш.
«Мунло» уш-акыл марафоным Марий Эл Республикын тӱвыра, савыктыш да калык-влакын пашашт шотышто министерствын полшымыж дене Республикысе марий тӱвыра рӱдер ден С. Чавайн лӱмеш Калыкле книгагудо эртарат.
