Таҥасымаш Марий Эл Республикыште калык-влак кокласе кылым пеҥгыдемдымашке виктаралтын. Тушко марий кундемысе калыкле-тӱвыра автономий ден ушем-влак ушненыт. Марий, руш, татар, азербайджан, чечен, дагестан, таджик калыкын ӱдыр-эргышт-влак Российыште да СССР-ыш пурышо эллаште илыше калыкын йӱлашт, лӱмлӧ еҥышт нерген йодыш-влаклан вашештеныт. Марафонын посна ужашыже Марий Эл дене кылдалтын.

Марий Эл Республикын тӱвыра, савыктыш да калык-влакын пашашт шотышто министрын алмаштышыже Галина Ширяева, Россий Президент пеленсе калык-влакын пашашт шотышто Советын йыжъеҥже, «Российысе марий-влак» федерал калыкле-тӱвыра автономийын Советшым вуйлатыше Лариса Яковлева марафоныш ушнышо-влакым Марий Элнан кечыже дене саламленыт, ончыкыжымат икте-весым пагален да жаплен илаш тыланеныт. Вет республикынан шӱдо ий жапыште тӱрлӧ сферыште ончыко кугу ошкылым ыштымаштыже тӱрлӧ калык гыч лекше еҥ-влакынат надырышт моткоч кугу.  Тидым марафон годым йодышлан вамутым пуымо годымат рашемдалтын.

Таҥӱчаш годым сеҥыше лийшашак! «Мунло» марафон ончыктен: икымше верыш «Мари» команде лектын.

Кокымшо вер – «Двуглавый орёл», Республикысе руш тӱвыра рӱдерын командыже.

Кумшо верыште «Бердемлек», Республикысе татар тӱвыра рӱдерын марафонецше-влак.

Марий Эл Республикын тӱвыра, савыктыш да калык-влакын пашашт шотышто министерствын полшымыж дене Республикысе марий тӱвыра рӱдер ден С. Чавайн лӱмеш Калыкле книгагудо «Мунло» уш-акыл марафоным эртареныт.