Сборник йоча-влаклан пайремым школлаште, йочасадлаште да тӱвыра пӧртлаште эртараш полшык семын савыкталтын. Тушко пытартыш ийлаште эртарыме йоча пайрем да конкурс-влаклан возымо сценарий-влакым пуртымо. Нунын авторышт рӱдерын кызытсе да ончычсо пашаеҥже-влак Л.И. Кошкина, Н.Н. Николаева, Г.Л. Сабанцев, Г.А. Ласточкина, Л.А. Сидоркина, Л. Бурков улыт. Тыгак сборникыш республикысе школлаште туныктышо-влакын пашаштым вераҥдыме. 2020 ийыште Марий автономийым ыштымылан ик курым, Кугу Сеҥымашлан 75 ий темме лӱмеш рӱдерын эртарыме сценарий конкурслаште сеҥыше-влакын пашаштым сборникыш пуртымо. Тиде – Юлсер кундем Пӧтъял кыдалаш школын туныктышыжо Н.А. Самосадкина, Советский район Кадам кыдалаш школ гыч З.А. Беляева, тиде район гычак, Кельмаксола кыдалаш школын туныктышыжо-влак Р.Н. Рассолова ден И.В. Караваева.

«Изи мӧр пеледыш» сборник кум ужаш гыч шога. «Йоча тӱня» икымше ужашыште кугыжаныш пайрем-влак дене кылдалтше мероприятий-влакым эртараш полшык пуалтеш. Тушко У ийым, Йочам аралыме тӱнямбал кечылан пӧлеклалтше «Изи мӧр пеледыш» пайремлам, «Колумб лудмаш», «Авам дене пырля» республикысе таҥӱчашлам, Пеледыш пайремыште «Модыш алан» эртарыме мероприятий гыч материал-шамычым савыктыме.

«Пагалена, шарнена, кугешнена» кокымшо ужаш Шарнымаш да Чап идалыклан, Кугу Сеҥымашлан 75 ий теммылан пӧлеклалтын. Почеламут корныла дене возымо композиций, митингым эртарымаште кучылтшаш материал-влакым тышке пуртымо.

Сценарийын кумшо ужашыже – «Йоча чонышто – марий йӱла». Калыкнан йӱлажым, шочмо-кушмо йылмыжым икшыве палышаш: пушеҥгат вож деч посна кошка. Тиде ужашым марий калык йӱла пайрем-влакым эртараш серыме паша-влак пойдарат.

Сборник фотосӱретлан поян. Тушко рӱдерын эртарыме мероприятийла гыч да тӱрлӧ конкурсышто, фотоӱчашыште сеҥышыш лекше-влакын фотоштым вераҥдыме.