Конкурс кум ужаш гыч шога. Участник-влаклан «Мый марий рвезе улам» визиткым ямдылыман. «Вий, проворлык да арвий» конкурсышто нуно кид-йол усталыкыштым, вий-арыштым, этнографий шинчымашыштым ончыктат. Тыгак тукым гыч тукымыш куснышо еш йӱла але калыкын йӱлаже дене палдараш тӱҥалыт. Тиде вашӱчашыш марий патырна-влак полшышо тӱшкам (йолташышытм, родо-тукымыштым але усталык коллективым) ушен кертыт.
Йодмашым 19 апрель марте mari-centr_konkurs@mail.ru электрон почто дене колтыман. Тыгак марий патыр-влаклан интернет йӱклымашке ушнат. Тидлан марий вургемым чийыман кум фотом кӱшҥӧ палемдыме e-mail-ыш колтыман. Эн шуко йӱкым погышо рвезе «Ончышо-влакын призышт» номинацийыште сеҥышыш лектеш.
«Марий патыр» республикысе конкурс 26 вӱдшорышто Йошкар-Оласе Тӱвыра да каныме рӱдӧ паркыште эртаралтеш. 16 шагатлан тӱҥалеш.
