Акцийыш МарНИИ-ын, Марий кугыжаныщ университетын, Марий книга савыктышын, Республикысе татар тӱвыра рӱдерын пашаеҥышт, журналист да блогер-влак ушненыт. Мероприятий Марий талешке кечылан пӧлеклалтше «Талешке корно» декаде кышкарыште эртен. Декаде 9 май марте шуйна.
Тудо сылнымут-сылнысем унагудо семын эртен. Марий прозаик ден поэт-влак Геннадий Сабанцев-Ояр, Александр Петров, Игорь Попов, Ирина Курочкина-Закиева шке почеламутыштым лудыныт. Российын Федерацийын сулло, Марий Эл Республикын калык артистше Маргарита Медикова марий поэт-влакын почеламутыштым лудын, поэтессе-влак Зоя Дудинан да Валентина Изилянован пашашт негызеш «Шарнен, огына лий ойган» моноспектакльым театрын сценыш лукмыж нерген каласкален.
Сылнысем ужашат поян лийын. Марий тӱвыра рӱдер пеленысе марий бард Геннадий Григорьевын вуйлатыме «У муро» вокал студийын мурызыжо-влак Ольга Якимова, Геннадий Куклин, Валерий Чиванов, Майя Ахмедзянова марий поэт-влакын почеламутыштлан келыштарыме муро-влакым йоҥгалтареныт.
Акцийыш тыгак татар да марий ача-аван эргыже Баламир Юлдашев ушнен. 10 ияш рвезын марла муралтымыжым акцийыш толшо-влак шокшын вашлийыныт. Тиде муро дене Баламир «Звезда удачи» Тӱнямбал фестиваль-конкурсышто кокымшо верым налын. Саламлена!
Палемдыман, «Мый марла ойлем» акцийым эртараш тӱҥалмылан тений 10 ий темын. Тудым самырык-влакын «ВийАР» мер ушемын чолга ӱдыр-рвезышт эртараш тӱҥалыныт, логотипым марий сӱретче С. Таныгин ыштен.
Икмыняр ий тиде акцийым Марий тӱвыра рӱдер эртара.
