Мероприятийыш школлаште марий йылмым, калык-влакын историйыштым да тӱвыраштым тунеммаште сай кӱкшытыш шушо, усталык вашӱчашлаште, фестивальлаште сеҥыше-влакым ӱжмӧ. Тиде – Шернур район Марисола кыдалаш, Куженер район Коҥганур, Советский район Ӱшнӱр да Кукмарий, Волжский район Пӧтъял, Медведево район Руш Кукмор, Йошкар-Оласе 2-шо номеран кыдалаш школ-влакын тунемшышт-влак. Пайрем марий йылме дене эрта.

Пайремын унаже-влакым оҥай программе вуча. Модыш аланыште йомак да мультфильмла гыч герой-влак йоча-влак калык модыш дене модыт. «Юзо шӱвыроҥ» шовын шоушто эсогыл шӱвыроҥ йымалне шогаш лиеш.

Концерт программа шке шотан: марий эстрадын артистше-влак марий рӱдолаште вокал студийлаште шуаралтше йоча-влак дене пырля сценыш лектыт. Российын сулло артистше Зоя Берникова «Падыраш» йоча фольклор коллективын участникше Максим Киндулкин дене мурат. Марий Эл Республикын калык артистше Светлана Осипова Серафима ден Софья ӱдыржӧ-влак, мурызо Володя Матвеев «Юкече» вокал студийын мурызыжо Данила Коротков, Роза Искакова «Мый артист» вокал студийын участницыже Элвия Николаева дене мурат. Тыгак пайремын изи унаже-влакым Шернур кунде гыч изак-шоляк-влак Илья, Алеша да Никита Шабдаровмыт, «Шокто, гармонь», «Онар» куштышо, «Падыраш» йоча коллектив-влак куандараш тӱҥалыт.

«Мый улам Марий Элын йочаже» («Дети Марий Эл») фотоончер рӱдерын йоча мероприятийым эртарыме татым почын пуа.

Пайремыш толшо кажне йоча-влакым «МариАйс» компаний лумэгерче, «Саскавий» марий ӱдырамаш ушем шере костенеч дене сийла.