Пайремым «Ший корно» калыкле-тӱвыра автономийым вуйлатыше Евдокия Соловьева ден Лениград областьысе Келшымаш пӧртым вуйлатыше Владимир Михайленкон саламмутышт дене почылтын.

Йӱдвел рӱдолаште илыше марий-влак калыкыштын тӱвыражым нӧлтымаште да ончыклык тукымлан арален кодымаште кугу сомылым шуктен шогат. Тидым пайремыш толшо уна-влак аклен кертыныт, семмастарышт-влакын сценыште шоктымышт, мурымышт да куштымышт гоч ужыныт, кидмастар-влакын ончерышт гоч почыныт. Питерыште сай йӱла уло: калыкле пайрем-влакыш, икте-весыштым пагален, тӱрлӧ общине, ушем-влак погынен толыт, ончерышт гоч шке йӱлашт дене палдарат, сцене гоч саламлат.

Пайремым икымше марий профессионал композитор И. Палантайын возымо семже дене почмо. Кӱсле дене Елена Таникова шоктен. Елена – Россий концертный деятель-влакын ушемыштын йыжъеҥже, российысе да тӱнямбал конкурс-влакын лауреатышт. Тиде кӱсле дене марий ӱдыр ятыр гана Сирийыште службым эртыше военный-влаклан концертыште шоктен.

Денис Михеев Виче кундем Уржум вел рекрут мурым йоҥгалтарен. А самырык-влакым ушышо «Югорно» фольклор ансамбль мурен-куштымаш деч посна тыгак модель семын Марий Эл гыч мийыше этнодизайнер, марий тӱр мастар Евгения Кошкинан вургем коллекцийжым ончыкташ полшеныт.

Марий Эл гыч делегацийым Марий тӱвыра рӱдерым вуйлатыше, Марий Эл Республикын Кугыжаныш Погынжын депутатше, «Российысе марий-влак» калыкле-тӱвыра федерал автономийын исполнительный директоржо Наталья Пушкина вуйлатен. Марий Элын тӱвыра, савыктыш да калык-влакын пашашт шотышто министерствын, тыгак ФНКА-н чап таныкышт да таумутышт дене мер пашаште чулымын тыршыше-влакым палемдыме. «Сото вий» фольклор ансамбль марий кумылым почын.

Каласыман, йӱдвел олаште «Пеледыш пайремыш» каяш «Российысе марий-влак» калыкле-тӱвыра федерал автономий ден Калык-влакын пашашт шотышто федерал агентстве полшеныт.

2022 ийыште «Ший корно» марий автономий 10 ияш лӱмгечыжым палемда, тынарак ийготым «пога» тысе «Пеледыш пайрем». Ончыкшым тудым регион-влак кокласе кӱкшытаным эртараш палемдыме.