«Марий блоггер-влакын школышт» проектын авторжо – этножурналист, блоггер Эльвира Куклина. Тудым Республикысе тӱвыра, печать да калык-влак паша шотышто министерствын полшымыж дене «Интеллектуал» тӱвыра-увер рӱдер эртара. Проектын йолташыже-влак: Марий кугыжаныш университет, «Ростелеком» ОАО-н Марий Эл Республикысе филиалже, Республикысе марий тӱвыра рӱдер.

Тиде школ шочмо йылмым Интернетыште шарыше марий блоггер-влакым ямдыла. Тӱҥалтышлан 18 ий деч кугурак 10 кумылан еҥым туныкташ шонена.

Школ годым блог дене кылдалтше ик эн тӱҥ йодыш-влакым каҥашаш палемдыме. Кузе Интернетыште оҥай, весымат лудаш, ончаш таратыше аккаунтым ышташ? Кузе блоглан возалтше еҥ-влакым шукемдаш? Блог кӱшеш оксам ыштен налаш лиеш мо? Нине да моло йодышымат рашемдена.

Тыгак «Конфликт гыч лектын моштымаш. Вашмутланымашым чын виктарымаш» теме дене тренинг вуча, да Марий Элын ик эн тале блоггерже-влак дене йыргешке ӱстел лиеш. Тунам национальный блогын кызытсе кӱкшытшӧ да ончыкылыкшо нерген ойлаш шонена.