Фестиваль тӱҥалтышыште республикын тӱрлö школжо гыч толшо тунемше ден туныктышо, уна-влак сарыште вуйым пыштыше-влакым шып шарналтеныт. Тиддеч вара Республикысе марий тӱвыра рӱдерым вуйлатыше Валерий Григорьев ден Марий кугыжаныш университетын студентше-влак марий талешке-влакын памятникышт воктеке пеледышым пышташ каеныт.
А иквереш чумыргышо-влаклан Марий Эл Республикысе тӱвыра, печать да калык-влакын пашашт шотышто министерстве деч саламмутым министерствын специалистше Ольга Веденькина каласен.
Фестиваль конкурс семын лийын. Презентаций сынан проектым 11 тунемше арален. Нуно шке кундемысе сарыште кучедалше: вуйым пыштыше, увер деч посна йомшо салтак-влак нерген, тылыште сеҥымашым лишемдыше пашаеҥ-влак нерген кугешнен ойленыт. Кажныже шуко материалым поген, компьютер полшымо дене сöрастарен. Шымлыме паша-влакым жюри аклен: Лидия Москвина, Марий кугыжаныш университетысе Калыкле тӱвыра да тӱвыра-влак кокласе кыл институтын доцентше, историй науко кандидат, Константин Свечников, Т.Е.Евсеев лӱмеш калыкле тоштерын калыкле полкан кугурак пашаенже, историй науко кандидат, Дмитрий Байдемиров, тиде тоштерынак этнографий пӧлкан вуйлатышыже, историй науко кандидат. Нуно тунемше-влакын погымо материалын нелытшым, тудым сӧрастарымым, калык ончылно шкем кучымым, марла яндарын кутырен моштымым онченыт.
Параньга район Пумарий школ гыч тунемше-влак шинелян ӱдыр-влак дене палдареныт. Нуно, тошто марий вургемым чиен, гармонь почеш салтакыш ужатыме мурым йоҥгалтареныт. А шинелян ӱдыр-влак ныжыл сем почеш шарнымашым каласкаленыт. Сеҥымашым таптыше ӱдырамаш-влак нерген тыгак Советский поселкысо 3-шо №-ан школ гыч тунемше-влак шымленыт (вуйлатыше Р.А.Богомолова). «Сеҥымашын кышаже мыйын ешыштем» — тыге маналтын Медведеве гимназийын тунемшыже Мария Петухован пашаже (вуйлатыше Р.И.Чендемерова). Звенигово поселкысо 3-шо №-ан школ гыч Воробьевмыт ешге толыныт. Виктория Веткина, Шернур 2-шо № кыдалаш школын 2-шо классыште тунемшыже, эн самырык участник лийын.
Конкурсын тӱҥ ужашыжым пытарымеке, тунемше ден туныктышо-влак «Сеҥымашын акше» йыргешке ӱстелыште мутланеныт. Ӱдыр-рвезе-влак мемнан элысе тале партизан-влакын лӱмыштым шарналтеныт, сеҥымашыш пыштыме надырышт нерген ойленыт.
Жюрин иктешлымыж почеш, 3-шо верыш Морко район Коркатово лицейын тунемшыже Мария Дементьева «Тендам шарнаш тӱҥалына» паша дене лектын, 2-шо верым У Торъял район Тошто Торъял кыдалаш школын тунемшыже Анастасия Мамаева «Ме нуным эре шарнена» паша дене налын, 1-ше верым Шернур район Совет Ушем Герой А.М. Яналов лӱмеш 1-ше №-ан кыдалаш школын тунемшыже Кристина Рукавишникова «Мыйын кугезе кочам» паша дене сеҥен. А чылаштым ончылтен Параньга район Пумарий кыдалаш школын тунемшыже Олеся Попова «Шинелян ӱдыр-влак» паша дене. Тудо абсолютный чемпион лӱмым сулен.
Конкурсыш ушнышо-влаклан сертификатым, а сеҥышыш лекше тунемше-влаклан грамотым да шарнаш кодшо пöлекым кучыктеныт. Фестивальым мурызо, Марий тӱвыра рӱдерын пашаеҥже Лариса Сидоркина сылне муро дене мучашлен.
«Ший талешке» фестиваль годымак «Салтакын солыкшо» акций эртен. Тудо але мучашлалтын огыл. Кумылан еҥ-влак материалыш салтакын фамилийжым, лӱмжым, ачалӱмжым, сарыш кайыме, колымо, йоммо ийым, воин званийым да суаптарым тӱрленыт. Южыжо марий тӱр дене солыкым келыштарен. Материалым посна тӱсаным ойыреныт: сареш вуйым пыштышылан йошкарге, сареш йомшылан ошо, сар деч вара колышылан ошалге канде солыкым кучылтыныт. Тиде акцийыш кумло утла паша пурен. Солыкым эше 9 май марте Марий тӱвыра рӱдерыш кондаш лиеш. Вара тӱрлымӧ солык-влакым иктыш урген, кугу тистым Т.Е.Евсеев лӱмеш тоштереш вераҥдат.
Тыгак «Сареш йомшо йоча пагыт» шымлыме паша конкурс (заочно) 25 май марте шуйна. Кумылан-влак конкурсыш ушнен кертыт.
Палемдыман, фестивальыш толшо-алаклан рӱдерын ямдылыме «Шарнаш кӱштеныт» фильмжым ончаш пайдале лийын. Тудо Марий кундем гыч сарыш кайыше да Сталинград кредалмаште увер деч посна йомшо салтак-влак нерген каласкала.
Тыгай фестиваль вес ийынат лиеш, а талешке-влак нерген шымлаш кумылан-влак шукемыт.
