17 сентябрьыште «Марий кас» Чарла Кремльыште тургымым петырен. Ынде каныме кас «Шӧртньӧ агур» кафеште кажне рушарнян  15.00 гыч 18.00 марте эрташ тӱҥалеш (Подольский курсант урем, 5).

Тиде гана каныше-влакым мурызо Эльвира Токташева куандарен. Эстраде муро почеш чылаштым кугу кругыш луктын. Калык муро почеш тавалташат йӧн лийын. Тидым ышташ Советский район Михайловка тӱвыра пӧртын «Лыжга сем» фольклор ансамбльже полшен. Посна мурызо-влакат почела микрофон деке лектыныт.

«Колызо» калык модышат кумылым нолтен. Тудым Нина Анисимова, «Лыжга сем» ансамбльын балетмейстерже эртарен. Тыгак кас мучко лотерей модылтын.

20 сентябрьыште «Шӧртньӧ агур» кафеште «Марий касын» шыжымсе сезонжо почылтеш. Толшо-влаклан весела кумылым мурызо Роза Искакова пӧлекла.