«Мунло» марий мут гынат, шукын огыт пале. Тудо «мудреч» мутын синонимже. Школышто тунемше-влак коклаште «мудреч-влак» лийын огыт керт гынат, йоча-влак тунеммаште ушан улмыштым ончыктеныт.

— Республикысе марий тÿвыра рÿдер марафоным икмынярымше гана эртара. Участник-влакын чотышт кушкын толыт. Мо куандара, районла гыч команде-влак уло кумылын ушнат, — каласкала организатор Л.И.Кошкина.

«Мунло-2015» 9 командым поген. Чылаже 11 команде заявкым пуэн улмаш, но 2-шо тÿрлö амаллан кöра толын кертын огытыл. Кажне командын радамыште – 6 участник. Нунын капитанышт лийыныт:

— Шернур районысо Марисола кыдалаш школын «Кырла тукымжо» командыже (лужавуй —  А.Емельянов);

— Медведево районысо Шойбулак кыдалаш школын «Энн» командыже (лужавуй – И.Волкова);

— Советский районысо Ўшнÿр кыдалаш школын «Ўшан» командыже (лужавуй – Е.Иванова);

— Морко пöсёлкысо 2-шо №-ан кыдалаш школын «Чулым» командыже (лужавуй – Н.Декина);

— Йошкар-Оласе 7-ше №-ан кыдалаш школын «Шонанпыл» командыже (лужавуй – К.Павлов);

— Республикысе политехнический лицей-интернатын «Вÿдвара шÿдыр» командыже (лужавуй – К.Павлов);

— Советский районысо Ургаш лицей-интернатын «Ургаш еш» командыже (лужавуй – А.Пуртов);

— МарГУ-н «Чимарий» командыже (лужавуй – А.Галиева);

— Советский посёлкысо 3-шо №-ан школын «Нöнчык-патыр» командыже (лужавуй – С.Зырин).

45 йодышан марафон Конкурс кум тур гыч шоген. Арам огыл тудым «марафон» манын лÿмденыт. Кажне турышто 15 йодыш лийын. Нуным вÿдышö лудын, тыгак монитор дене пырдыжыште ончыктымо.

Команде ик минут жапыште вашмутым кагазыш возен, волонтёрлан пуэн. Нуныжо вигак секретарь-влаклан тергаш намиеныт.

Чыла тидым апелляций комиссий эскерен шинчен. Тудым Россий писатель ушемын членже Альбертина Иванова вуйлатен. Тудлан Т.Евсеев лÿмеш калыкле тоштерысе пашаеҥ-влак Дмитрий Байдимиров да Анастасия Айгузина, тыгак Йошкар-Оласе образований управленийысе самырык политике пöлкан еҥже Роза Чемекова полшеныт.

Кажнылан вашмут лийын огыл    

Кажне турын шке темыже лийын: «Шочмо верын лÿмлö еҥже-влак», «Марий йылме да сылнымут», «Марий калыкын тÿвыраже да йÿлаже». Йоча-влак ямдылалт толыныт гынат, южо йодышлан вашмутым пуэн кертын огытыл.

Кажне турышто йöсат-куштылгат лийыныт. Мутлан, икымшыште: Чавайнын молан тыгай псевдонимже але икымше марий балетын авторжо. Йоча-влак тидлан вашмутым пуэныт, а мутлан, Тÿнямбал, СССР, Россий кÿкшытан параолимпийский модмаште марий чемпион-влакым але Марий кундем гыч кö «икымше военный лётчик» лÿмым налшым каласен кертын огытыл.

«Марий йылме да сылнымутыштат» тыгак лийын. Рвезе-влак «Евгений Онегиным» кусарыше марий поэт-влакым возеныт, а пытартыш орфографий мутер лекмын ийготшым пален огытыл.

Кумшо турышто йÿла дене кылдалтше калыкмут-влакым шуеныт, такмакым могай йÿлалан пöлеклымым ойленыт. Чын вашмутым колмеке, команде-влак, куанымышт дене, кöн чын возымыж дене палдареныт.

Кум турым эртымеке, эн шуко баллым Марий Кугыжаныш университетын «Чимарий» командыже поген, кокымшо верыште – Советский районысо Ургаш лицей-интернатын «Ургаш еш» командыже, кумшышто – Йошкар-Оласе Политехнический лицей-интернатын «Вÿдвара шÿдыр» командыже. Сеҥыше-влакым кубок, пöлек да диплом дене палемденыт. Сертификатым кажне участниклан кучыктеныт.

Ўшаныме шуэш, тыгай мероприятий-влак самырык тукымым шочмо йылмым, тÿвырам да историйым утларак тунемаш да пагалаш кумылаҥда.