Семинарыште Марий Эл гыч Республикысе марий тӱвыра рӱдерын марий йылме ден тӱвырам инноваций йӧн дене вияҥдыме шотышто пӧлкам вуйлатыше Андрей Чемышев ден Марий Википедийын администраторжо Вадим Протасов лийыныт да паша опытышт дене палдареныт. Марий википедист-влакын пашашт тӱвыргӧ. Компьютер дене пайдаланыше марий еҥ А.Чемышевын ямдылыме электрон мутерлан да марла чын возымым тергыше программылан эҥертен, шочмо йылмыж дене чын серен кертеш. Яндекс кампаний дене икойыш толмо марий йылмым Яндекс.Переводчик мобил приложенийыш пуртымо. Тыге марла возымо посна мут, текст тӱнямбалсе 85 йылмыш автоматически кусаралтыт. Марий йылме дене Википедийым ыштымаште моло инструментарийымат пуртымо сомыл умбакыже шуйна. В.Протасов Марий Википедийым текст-влак дене пойдарыме паша кузе каен шогымо дене палдарен, тиде сомылым шуктымаште Марий университетын преподавательже ден студентше-влакын изи огыл надырыштым палемден.

Ижевскыште эртарыме вики-семинар — Урал велнысе тыгыде калык-влакын Википедийыштым ыштымашым шымлыше-полшышо кокымшо мероприятий. Икымшыже кодшо ийыште Уфа олаште «ВикиСабантуй» лӱм дене эртен да Пошкырт Википедийым ыштымылан 10 ияш лӱмгечыжлан пӧлеклалтын. 2017 ийыште кумшо тыгай семинар Йошкар-Олаште эрташ тӱҥалеш. Тудо марий калыкын ик йӧратыме Пеледыш пайремым эртарыме гутлаште лиеш.