Марий Эл Республик Виктер вуйлатышын икымше алмаштышыжын секретариатшым вуйлатыше Э.В.Чемышев шукерте огыл савыктен лукмо «Нормативно-правовая основа языковой политики в Республике Марий Эл» тӱҥ документ-влак ойпого дене палдарен.
Мер Каҥаш вуйлатышын оналмашыже И.Эштуков республикыште пашам ыштыше самырык-влакын мер организаций-влак дене палдарен. Варажым нине мер организаций-влакым вуйлатыше-влак иктаҥаш йолташышт дене пырля мероприятийым, акций але флешмобым эртарымышт нерген, проект пашаш ушнымашын пайдаже да кӱлешлыкше нерген каласкаленыт. Сессийын участникше-влак Э.В.Куклинан вуйлатыме «Интеллектуал» тӱвыра да информаций рӱдерын, тудын кышкареш шочшо «Арслан» интернет этножурналын пашаже, проектым возымо да тудым илышыш шыҥдарыме йӧн нерген кумылын ойлен. Ик тыгай проектын саскажым – марий мульфильмым – сессийын участникше-влак аклен кертыныт. Тыгак «ВийАр» организацийым вуйлатыше Н.И.Любимов ойлен. Кандашымше марий самырыктукым слетын, Курыкмарий кундемыште эртыше «Кравец» форум кучем кӱкшытыштӧ пашам виктараш тунемме дене шерге улыт. «Унчоfest” конкурс-фестиваль тӱрлӧ кундемысе ӱдыр-рвезе-влакым ушен, видеом войзаш туныктен. Пашаштлан эн ончыч Унчо калык акым пуэн.
Республикысе марий тӱвыра рӱдер самырык-влак дене шуко пашам эртарен шога. Ик кугу проектше – тиде «Эко-культур» форум. Тудо ялысе марий самырык ӱдыр-рвезе-влакым ушен. Форум Финляндийысе М.А.Кастрен ушемын полшымыж дене эртен. Экологий да этнокультур туныктымашым шарымаште самырык-влакын инициативыштлан вийым пуымо да тиде йодыш дене проектым возымо да варажым тудым илышыш шыҥдарыме амал дене тудо эртаралтын. Тыгак кугурак класслаште тунемше-влаклан эртарыме слет ӱдыр-рвезе-влаклан лидер семын кушкаш могай-гынат ошкылым ышташ полшен. Марий йӱлам арален да самырык тукымым тиде сомылыш ушышо вий семын «Ӱдырсий» регион-влак кокласе кӱкшытыш нӧлталалтше конкурсым шотлыман. Тушко Марий Элысе районла деч посна Татарстан, Пошкырт кундемласе ӱдыр-влак ушненыт. Тыгак марий огыл але марий ача-аван марла тунемдыме икшыве-влакым марий йылме деке шӱмаҥдаш манын, рӱдер вес проектым илышыш шыҥдаре – «Марла ойлаш тунемына» мультипликационный урок-влакым ямдылен. Тидын нерген марий тӱвыра рӱдерын пӧлка вуйлатыше Л.И.Кошкина каласкален. Сессийын участникше-влак мультурокын икымше ужашыжым онченыт, сай акым пуэныт. Тиде тӧнежынак инноваций йӧн дене марий йылме ден тӱвырам вияҥдыме шотышто пӧлка вуйлатыше А.В.Чемышев йылмын компьютер йӧнлан эҥертен вияҥмыже, «Яндекс.Кусарыше» проектын пашаж дене палдарен.
Верлаштат самырык-влак дене да нунын дене пырля сомыл шукталтеш. Тидын нерген Пошкырт кундем гыч Марий Мер Каҥашын еҥже А.Ибулаев, Провой кундем гыч тӱвыра пашаеҥ А.Мартынов, тиде район гычак амалкалче В.Петров, «Кугарня» газетын тӱҥ редакторжо Э.Иманаев, Озаҥ ола гыч самырык меръеҥ Ю.Таныгина каласкаленыт.
Марий Мер Каҥаш сессийын резолюцийжым пеҥгыдемдыме.
