Мероприятий «йыргешке ӱстел» кышкарыште эртен. Тушто марий тӱвырам вияҥдымаште, самырык тукымым марий йылме, йӱла деке шӱмаҥдымаште рӱдерын да республикысе марий изданий-влакын пашашт нерген ойлымо. Рӱдерын эртарыме кажне мероприятийжым шукырак калык деке намиен шуктымаште газет, телевидений да радио пашаен-влак кугу пашам шуктен шогат, соцкыл лаштыклаштат вераҥдат.

Рӱдер вуйлатыше, Марий Эл Республикын Кугыжаныш Погынжын депутатше Наталья Пушкина журналист-влаклан Таумутым кучыктен, пашаштышт сеҥымашыш шуаш, шукырак сай увер-влак дене лудшо да колыштшо-влакым куандараш тыланен.

Тудым «Марий Эл» газетын пӧлка редакторжо Светлана Носовалан да фотокорреспондентше Михаил Скобелевлан, «Кугарня» газетын сайтшым вӱдышӧ Валентина Семеновалан, «Ямде лий» газетын тӱҥ редакторжо Людмила Григорьевалан, «Марий Эл» ГТРК-н корреспондентше Виталий Бурковлан, «Марий Эл радио» ответственный редакторжо Марина Глушковалан, «МЭТР» ГАУК-ын корреспондентше-влак Вера Гороховалан да Наталья Ямаевалан кучыктымо.

Тыгай вашлиймашым ончыкыжымат эртараш палемдыме.