Раисия Михайловна – Юлсер кундем Корамас кундемын шочшыжо. Марий йылмым, культурым йӧратен кушмыжо тудым И.С. Палантай лӱмеш музыкальный училищыш конден. Варажым кӱшыл шинчымашым Н.К. Крупская лӱмеш Марий пединститутышто налын.

Р.М. Данилова чын верч тавадаҥ шоген моштымыжо дене мыланна шерге ыле. Пагалымашым тудо пеҥгыде тупрӱдан улмыжо, пашам чаткан  шуктымыжо дене сулен налын. Тудо моткоч йӧратен шке кундемжым, шочмо калыкшым. Тудо Айдемым йӧратен, а должностьым, рангым огыл. Тыглай еҥын илыш корныштыжо татулыкым ужын моштен, радиом колыштшо-влак деке намиен шуктен. Марий тӱвырам вияҥдымаште, марий сем сымыктышым профессионал кӱкшытыш нӧлталмаште надырже моткоч кугу. Тидым тудо шке примерже дене ончыктен: сценыште эре тӱрлеман марий вургем дене лектын, а мурыжо-влакын кажне мутышт чонеш логалше але шонаш таратыше лийыныт.

Вучыдымо туткар тале айдемын илышыжым нале. Моткоч неле, но лийшым лийдымым от ыште, кайышым от пӧртылтӧ.

Юлсер кундем гыч Марий Эл Республикын Кугыжаныш Погынын депутатше-влак Н.В. Пушкина ден Л.Н. Яковлева  Р.М. Данилован эргыжлан, уныкаже-влаклан, родо-тукымжылан чаманымашым каласена. Поро шарнымашна тек узьмакыш корным почеш.