Форум – «Российысе марий-влак» федерал калыкле-тӱвыра автономийын проектше. Мер ушем калык-влакын пашашт шотышто федерал агенствын субсидийжым сеҥен налын. Республикысе марий тӱвыра рӱдерын пашаеҥже-влак мероприятийлан ямдылыме да эртарыме сомылым шуктеныт.
Форум 29 гыч 31 август марте Кокшайск поселко воктен верланыше «Росинка» унагудо комплексыште эртен. Кызыт пандемийлан кӧра ограничений манме пытен огыл. Тидым шотыш налын, организатор-влак лӱдыкшо ынже лий манын, кӱлеш мерым ыштеныт. Эн ончыч – мероприятий петырыме кумдыкышто эртен, ӧрдыж еҥ лийын огыл.
Форум кум кече шуйнен. Тиде жапыште тӱрлӧ теме дене лекций, семинар, йыргешке ӱстел эртеныт. Национальный лӱдыкшымылык, информационный лӱдыкшымылык шотышто йодышым лончылымо. Тидын Марий Элын Конституционный судьян алмаштышыже Валериан Егоров, Поволжский кугыжаныш технический университетын преподавательже Владимир Смирнов каласкаленыт.
Марий Элыште илыше калык-влакын этнический кылын историйжым шергалме. Тиде йодышым историй велымат, религий могырымат шергалме. Тидым Марий Элын митрополийжын, мусульман-влак духовенствын да Марий юмынйӱла ушемын еҥже-влак: Евгений ача, Адыхан Мисир Алиев да Альберт Рукавишников ыштеныт. Историй могырым палемдыме темым историй шанче кандидат Сергей Свечников рашемден.
«Марий Элыште калык-влакын вашмутланымашышт» йыргешке ӱстел форумым почмо деч вара эртен. Тӱрлӧ калыкын мер ушемыштым вуйлатыше-влакын мер пашашт нерген ойлымыштым Марий Эл Республикын элкӧрго политике, верысе самоуправленийын вияҥме да юстиций министр Михаил Данилов, Тӱвыра, савыктыш да калык-влакын пашашт шотышто министрын алмаштышыже Игорь Садовин колыштыныт, нӧлталме йодышыштлан вашештеныт.
Форумын тӱвыра программыжат поян лийын: икымше кечынак уш-акыл марафон эртен, этнотайм марий, руш, армян, татар, чуваш калык-влакын тӱвырашт дене палдарен. «Икоян ешыште» концертым тӱрлӧ калыкын еҥже-влак шынденыт, а «Марий Эл» куштышо кугыжаныш ансамбль «Калык-влакын куштымашышт» программе дене выступатлен. Тыгак Российын сулло артистше Зоя Берникова, Марий Элын калык артистше Светлана Осипова руш да марий муро-влакым йоҥгалтареныт.
Икте куандарыш: «Российысе марий-влак» калыкле-тӱвыра автономийын да Марий тӱвыра рӱдерын пашажым Российын рӱдола кӱкшытыштӧ ужыныт. Российысе Калык-влакын келшымаш пӧртыштын директоржо Андрей Березин, Российысе калык-влакын ассамблейыштын Советшым вуйлатыше Светлана Смирнова саламлымаш мутым колтеныт. Тидыже иктым ойла: «Кӧнен илыме кумдык» межнациональный форумын ончыклыкшо уло.
