Икымше гана родо-тукым финн-угор калык-влакын кечыштым 1928 ийыште Финляндийыште Калевала кечын эртарыме. Вес ийынже Эстон Республикыште палемдыме. 1931 ийыште Финн-угор культурын IV конгрессыште Финляндийыште, Эстонийыште да Венгрийыште ий еда тиде кечым октябрьын кумшо арнянже эртараш палемдыме. 90-шо ийлаште Российыште, финн-угор калык-влак илыме республикылаште, эртараш тӱҥалме.
Марий тӱвыра рӱдер тиде кечын «Финн-угор модмашым» эртарен. Тений тиде датылан «Одо тӱвыра кече» Келшымаш урок пӧлеклалтеш. Тудо шыжа тылзын 20 кечынже Усталык ушем-влакын пӧртыштышт лиеш. 16 шагатлан тӱҥалеш.
Эн кугу финн-угор тематикылан пӧлеклалтше мероприятий – «Угинде» пайрем. Фестиваль-конкурс 19 октябрьыште Сеҥымашын 30-шо идалыкше лӱмеш тӱвыра полатыште лиеш, 18 шагатлан тӱҥалеш.
